काठमाडौं । सानिमा बैंक लिमिटेडले आर्थिक वर्ष २०८२/८३ को अन्त्यसम्म कायम रहेको सञ्चित मुनाफाबाट सेयरधनीलाई नगद लाभांश वितरण गर्ने प्रस्ताव गरेको छ।
बैंकको भदौ ११ गते बसेको सञ्चालक समितिको बैठकले हाल कायम चुक्ता पुँजीका आधारमा साधारण सेयरधनीलाई करसहित १० प्रतिशत नगद लाभांश वितरण गर्ने प्रस्ताव गरेको हो। प्रस्तावित लाभांश नेपाल राष्ट्र बैंकको स्वीकृति तथा आगामी साधारणसभाबाट पारित भएपछि सेयरधनीलाई वितरण गरिने बैंकले जनाएको छ।
त्यसैगरी बैंकले अग्राधिकार सेयरधनीलाई ८.२५ प्रतिशत नगद लाभांश वितरण गर्ने प्रस्ताव गरेको छ। अग्राधिकार सेयरको लाभांश सेयर बाँडफाँट भएको मितिदेखि आर्थिक वर्ष २०८२/८३ सम्मका लागि समानुपातिक रूपमा प्रदान गरिने बैंकले जनाएको छ।
बैंकको हालको साधारण सेयर पुँजी १३ अर्ब ५८ करोड १५ लाख २५ हजार ४१४ रुपैयाँ ९३ पैसा रहेको छ। अग्राधिकार सेयर पुँजी भने २ अर्ब रुपैयाँ रहेको बैंकले जनाएको छ।
सानिमा बैंकले देशका सातै प्रदेशमा १३४ वटा शाखा तथा १२७ वटा एटीएम सञ्चालन गर्दै आएको जनाएको छ । बैंकले ग्राहकलाई विभिन्न बैंकिङ सेवा प्रदान गर्दै आएको छ।
लाभांश वितरणसम्बन्धी प्रस्ताव नेपाल राष्ट्र बैंकको स्वीकृति र बैंकको आगामी साधारणसभाबाट पारित भएपछि कार्यान्वयनमा आउनेछ।
