काठमाडौं । सिप्रदी यात्रीले नेपालमै इन्जिनियरिङ तथा उत्पादन गरिएको नयाँ विद्युतीय स्कुटर ‘यात्री पी२’ को मूल्य सार्वजनिक गरेको छ। कम्पनीका अनुसार पी२ को सुरुवाती मूल्य ३ लाख २९ हजार ९ सय रुपैयाँ निर्धारण गरिएको छ।
नेपालका सडक तथा भौगोलिक अवस्थालाई ध्यानमा राखेर विकास गरिएको पी२ मा ग्राहकले आफ्नो आवश्यकता र रुचिअनुसार ब्याट्री क्षमता, रङ, आरामदायीपन तथा विद्युतीय सुविधाका विभिन्न विकल्प छनोट गर्न सक्नेछन्।
स्कुटरमा बीच भागमा जडान गरिएको मोटर प्रयोग गरिएको छ। यसले पाङ्ग्रामा ३१५ एनएम टर्क उत्पादन गर्ने कम्पनीको दाबी छ। पी२ मा उच्च मजबुतीको स्टिल च्यासिस, लामो यात्रा गर्न सक्ने सस्पेन्सन, १४ इन्चका पाङ्ग्रा, दुईतर्फी डिस्क ब्रेक र संयुक्त ब्रेक प्रणाली उपलब्ध छन्।
पी२ मा तीन प्रकारका ब्याट्री विकल्प दिइएको छ। कम्पनीका अनुसार ३.० किलोवाट आवर क्षमताको ब्याट्रीले सहरी क्षेत्रमा ९० किलोमिटरसम्म, ३.७ किलोवाट आवर क्षमताले ११२ किलोमिटरसम्म र ५.२ किलोवाट आवर क्षमताले १५७ किलोमिटरसम्म यात्रा गर्न सकिन्छ।
थप ब्याट्री प्याक प्रयोग गरेर थप ५० किलोमिटरसम्म यात्रा दूरी बढाउन सकिने कम्पनीले जनाएको छ। ब्याट्रीमा ८ वर्ष वा ८० हजार किलोमिटरसम्मको प्रत्याभूति दिइएको छ।
स्कुटरमा नै चार्ज गर्ने उपकरण जडान गरिएको अवस्थामा ब्याट्रीको क्षमताअनुसार घरमै साढे दुई घण्टाभन्दा कम समयमा पूर्ण चार्ज गर्न सकिने कम्पनीले जनाएको छ।
पी२ ले तीव्रगतिमा चार्ज गर्ने प्रणालीसमेत समर्थन गर्ने र तोकिएको अवस्थामा करिब ४१ मिनेटमा चार्ज गर्न सकिने कम्पनीको दाबी छ।
पी२ मा ७ इन्चको सूचना पर्दा, ताररहित एप्पल कारप्ले तथा एन्ड्रोइड अटो, बाटो पहिचान तथा निर्देशन प्रणाली र मोबाइल अनुप्रयोगमार्फत सवारीको प्रत्यक्ष निगरानी गर्न सकिने सुविधा छन्।
त्यस्तै मोबाइल अनुप्रयोगबाट चार्जको अवस्था हेर्न, यात्रा मार्ग तय गर्न तथा मर्मतसम्भारका लागि समय लिन सकिनेछ। स्कुटरमा उकालोमा रोकिँदा पछाडि नसरिने प्रणाली, निश्चित गतिमा निरन्तर चलाउने सुविधा, विभिन्न सञ्चालन विधि, ऊर्जा पुनःसञ्चय गर्ने ब्रेक प्रणाली तथा चाबीबिनै सञ्चालन गर्न सकिने सुविधा पनि राखिएको छ।
टेकुस्थित सिप्रदी यात्रीको नयाँ अनुभव केन्द्र अक्टोबर २०२६ को पहिलो सातादेखि सञ्चालनमा ल्याउने तयारी गरिएको कम्पनीले जनाएको छ।
कम्पनीका अनुसार ३.७ र ५.२ किलोवाट आवर ब्याट्री भएका भेरियन्टको वितरण अक्टोबरको मध्यदेखि नोभेम्बरसम्म सुरु हुनेछ। अन्य भेरियन्टको वितरण भने डिसेम्बर २०२६ देखि सुरु गर्ने तयारी गरिएको छ।
