भोजपुर । भोजपुरको हतुवागढी गाउँपालिकाले भोटेकोशीमा बाढीबाट प्रभावित भएका नागरिकको उद्धार, राहत तथा पुनर्स्थापनाका लागि आर्थिक सहयोग गर्ने भएको छ ।
गाउँपालिकाले २४ लाख ५३ हजार ५०४ बराबरको सहयोग प्रधानमन्त्री दैवी प्रकोप उद्धार कोषमा जम्मा गर्ने भएको हो । स्थानीय सरकार, जनप्रतिनिधि, राष्ट्रसेवक कर्मचारी र सामुदायिक विद्यालयका शिक्षक तथा कर्मचारीले उक्त सहयोग संकलन गरेका हुन् ।
गाउँपालिकाका प्रमुख प्रशासकीय अधिकृत महेश निरौलाका अनुसार संकलित रकममध्ये सबैभन्दा ठूलो हिस्सा सामुदायिक विद्यालयमा कार्यरत शिक्षक तथा कर्मचारीहरूबाट प्राप्त भएको छ । पालिकाभित्रका सामुदायिक विद्यालयमा कार्यरत शिक्षक तथा कर्मचारीबाट १६ लाख दुई हजार ७७७ जुटेको छ ।
यसैगरी, गाउँपालिकाका कर्मचारीबाट ६ लाख ७१ हजार १२७, जनप्रतिनिधिबाट ७९ हजार र गाउँपालिकाको विपद् व्यवस्थापन कोषबाट एक लाख गरी कुल २४ लाख ५३ हजार ५०४ बराबरको सहयोग जुटेको प्रमुख प्रशासकीय अधिकृत निरौलाले जानकारी दिए ।
भोटेकोशीका बाढीपीडितलाई सहयोग पुगोस् भन्ने पवित्र भावनाले सहयोग गरिएको गाउँपालिका अध्यक्ष प्रेमकुमार राईले बताए ।
