काठमाडौं । नेपाल चेम्बर अफ कमर्सका कार्यवाहक अध्यक्ष दीपककुमार मल्होत्राले नेपाली उत्पादनको ब्रान्डिङ, गुणस्तर र बजार विस्तारमा विशेष ध्यान दिनुपर्ने बताएका छन्। नेपाली उत्पादन राम्रो हुँदाहुँदै पनि प्रभावकारी ब्रान्डिङको अभावमा स्वदेशी तथा अन्तर्राष्ट्रिय बजारमा अपेक्षित पहिचान बनाउन नसकेको उनले बताए।
‘नेपाली ब्रान्ड परिदृश्य, २०८३’ सम्बन्धी अनुसन्धानात्मक प्रतिवेदन सार्वजनिक कार्यक्रममा बोल्दै मल्होत्राले नेपालमा नेपाली वस्तुको ब्रान्डिङ कमजोर रहेको र कतिपय अवस्थामा नक्कली ब्रान्डसमेत बजारमा बिक्री भइरहेको उल्लेख गरे ।
‘नेपालमा धेरै सम्भावना भएका वस्तु छन् । छुर्पी, बेसार र अलैंचीजस्ता उत्पादनको समेत प्रभावकारी ब्रान्डिङ गर्न सकिएको छैन,’ उनले भने, ‘ब्रान्डिङका क्षेत्रमा कानुनी समस्या पनि छन्। उपयुक्त कानुन बनाएर त्यसलाई छिटो र प्रभावकारी रूपमा कार्यान्वयन गर्न आवश्यक छ।’
उनले नेपाली ब्रान्ड कुनै वस्तु वा सेवाको नाममा मात्र सीमित नभई उत्पादन क्षमता, उद्यमशीलता, रोजगारी, लगानी, प्रविधि, गुणस्तर र नेपालको आर्थिक पहिचानसँग जोडिएको विषय भएको बताए ।
नेपालमा उत्पादन बढाउने, आयात घटाउने र निर्यात विस्तार गर्ने विषयमा लामो समयदेखि बहस हुँदै आए पनि उत्पादन बढाउनु मात्र पर्याप्त नहुने उनको भनाइ थियो । उत्पादनसँगै ब्रान्डिङ, गुणस्तर, बजार विस्तार र उपभोक्ताको विश्वास निर्माणमा पनि उत्तिकै ध्यान दिनुपर्ने उनले बताए।
‘मेड इन नेपाल’लाई विश्व बजारमा चिनाउनुपर्ने
मल्होत्राले नेपाली उत्पादनको गुणस्तर राम्रो भए पनि अन्तर्राष्ट्रिय बजारमा नेपाली ब्रान्डको पहिचान अपेक्षाकृत कमजोर रहेको बताए । ‘मेड इन नेपाल’लाई विश्व बजारमा बलियो पहिचान दिलाउन सरकार, निजी क्षेत्र र सञ्चार क्षेत्रबीच सहकार्य आवश्यक रहेको उनको भनाइ थियो।
नेपाली ब्रान्डलाई स्वदेशी बजारमा मात्र सीमित नराखी क्षेत्रीय तथा अन्तर्राष्ट्रिय बजारमा प्रतिस्पर्धा गर्न सक्ने बनाउनुपर्नेमा उनले जोड दिए। त्यसका लागि सरकारले स्थिर नीति, सहज व्यावसायिक वातावरण, लगानीमैत्री कानुन, पूर्वाधार र प्रविधिको विकासमा ध्यान दिनुपर्ने उनले बताए।
निजी क्षेत्रले उत्पादनको गुणस्तर, नवीनता र प्रतिस्पर्धात्मक क्षमता बढाउनुपर्ने तथा सञ्चार क्षेत्रले नेपाली उत्पादन र सफल उद्यमशीलताका सकारात्मक कथा स्वदेश तथा विदेशमा पुर्याउन महत्त्वपूर्ण भूमिका खेल्न सक्ने उनको भनाइ थियो।
नीति निर्माणमा प्रतिवेदन उपयोगी हुने विश्वास
नेपाली उद्योग तथा व्यवसायको विकास, स्वदेशी उत्पादनको प्रवर्धन र नेपाली ब्रान्डको पहिचानलाई प्राथमिकतामा राखेर अध्ययन तथा प्रतिवेदन तयार गरेकोमा मल्होत्राले कर्पोरेट नेपाललाई धन्यवाद दिँदै बधाई दिए।
उनले ‘नेपाली ब्रान्ड परिदृश्य, २०८३’ सम्बन्धी प्रतिवेदनले नेपाली ब्रान्डको वर्तमान अवस्था, चुनौती र सम्भावना बुझ्न महत्त्वपूर्ण आधार प्रदान गर्ने बताए। प्रतिवेदन आगामी दिनमा नीति निर्माण तथा व्यावसायिक रणनीति तय गर्नसमेत उपयोगी हुने विश्वास उनले व्यक्त गरे।
नेपाली उत्पादनलाई स्वदेशी बजारमा मात्र नभई विश्व बजारमा समेत गर्वका साथ स्थापित गर्न सबै पक्ष मिलेर अघि बढ्नुपर्नेमा जोड दिँदै उनले नेपाली ब्रान्डको विकासबाट उत्पादन, रोजगारी, निर्यात र समग्र अर्थतन्त्रलाई थप बलियो बनाउन सकिने बताए।
