काठमाडौं । सेयर बजारमा लगातार दोस्रो दिन उत्साहजनक वृद्धि देखिएको छ। बिहीबार नेपाल स्टक एक्सचेन्ज (नेप्से) परिसूचक ३१.५४ अंकले बढेर २ हजार ६९५ विन्दुमा पुगेको छ। यो परिसूचक गत साउन १२ गतेयताकै उच्च विन्दु हो।
अघिल्लो दिन बुधबार पनि नेप्से ३३ अंकले बढेको थियो। लगातार दुई कारोबार दिनमा बजारमा उल्लेख्य वृद्धि देखिएपछि लगानीकर्तामाझ सकारात्मक माहोल बनेको छ। परिसूचकसँगै कारोबार रकमसमेत बढेकाले बजारमा खरिद गतिविधि बलियो देखिएको छ।
बिहीबार कुल ८ अर्ब ५५ करोड रुपैयाँ बराबरको सेयर कारोबार भएको छ। अघिल्लो दिन ७ अर्ब ४५ करोड रुपैयाँको कारोबार भएको थियो। यसअनुसार एकै दिन कारोबार रकममा १ अर्ब १० करोड रुपैयाँको वृद्धि भएको छ।
बिहीबारको कारोबार रकम गत वैशाख ३ गतेयताकै उच्च हो। उक्त दिन ९ अर्ब ३१ करोड रुपैयाँ बराबरको सेयर कारोबार भएको थियो। कारोबार रकममा आएको वृद्धिले बजारमा लगानीकर्ताको सक्रियता बढेको देखाएको छ।
बिहीबार कारोबार भएका कम्पनीमध्ये अधिकांशको सेयर मूल्य बढेको छ। कुल १८१ कम्पनीको मूल्य वृद्धि हुँदा ९१ कम्पनीको मूल्य घटेको छ भने ६ कम्पनीको मूल्यमा कुनै परिवर्तन आएको छैन।
सेयर मूल्य बढ्ने कम्पनीको संख्या घट्ने कम्पनीको तुलनामा उल्लेख्य बढी रहेकाले बजारको समग्र गति सकारात्मक देखिएको छ। परिसूचकमा आएको वृद्धि र कारोबार रकममा भएको विस्तारले बजारमा खरिद पक्षको प्रभाव बलियो रहेको संकेत गरेको छ।
बिहीबार नेप्सेमा कारोबार भएका सबै समूहगत सूचक बढेका छन्। बैंकिङ, विकास बैंक, वित्त तथा होटल तथा पर्यटन समूहमा उल्लेख्य वृद्धि देखिएको छ।
बैंकिङ समूह २.२८ प्रतिशतले बढेको छ भने विकास बैंक समूह १.५५ प्रतिशतले उकालो लागेको छ। वित्त समूह १.६९ प्रतिशत र होटल तथा पर्यटन समूह २.०५ प्रतिशतले बढेका छन्।
त्यस्तै, जलविद्युत समूह ०.३६ प्रतिशत, लगानी समूह ०.२४ प्रतिशत, जीवन बिमा समूह ०.६८ प्रतिशत तथा उत्पादन तथा प्रशोधन समूह ०.५१ प्रतिशतले बढेका छन्।
लघुवित्त समूह ०.५४ प्रतिशत र निर्जीवन बिमा समूह ०.१३ प्रतिशतले बढेका छन् । अन्य समूहमा २.४५ प्रतिशतको वृद्धि देखिँदा व्यापार समूह ०.०३ प्रतिशतले उकालो लागेको छ।
सबै समूहगत सूचक सकारात्मक रहनुले बजारको वृद्धि कुनै एक क्षेत्रमा मात्र सीमित नभई विभिन्न क्षेत्रका कम्पनीमा फैलिएको देखाउँछ।
बिहीबार सेयर मूल्य वृद्धिका आधारमा बेनी हाइड्रोपावर पहिलो स्थानमा रहेको छ । हालै सूचीकृत यस कम्पनीको मूल्य १५ प्रतिशतले बढेको छ।
सोपान फर्मास्युटिकल्सको सेयर मूल्य ८.७२ प्रतिशतले बढेको छ। नेपाल पुनर्बीमा कम्पनीको मूल्य ५.६१ प्रतिशत, नेपाल फाइनान्सको ५.४९ प्रतिशत, एनआईसी एसिया बैंकको ४.६९ प्रतिशत तथा कालिन्चोक हाइड्रोपावरको ४.४१ प्रतिशतले बढेको छ।
अर्कोतर्फ, एनआरएन इन्फ्रास्ट्रक्चरको सेयर मूल्य ३.६५ प्रतिशतले घटेको छ। चिरख्वा हाइड्रोपावरको मूल्य ३.१४ प्रतिशत र राष्ट्रिय बीमा कम्पनीको मूल्य २.७२ प्रतिशतले ओरालो लागेको छ।
कारोबार रकमका आधारमा घलेम्दी हाइड्रोपावर बिहीबार सबैभन्दा अगाडि रहेको छ। त्यसपछि सिद्धार्थ बैंक, लक्ष्मी सनराइज बैंक, कुमारी बैंक, ग्रिन भेन्चर्स र सोलु हाइड्रोपावरका सेयरमा उच्च कारोबार भएको छ ।
