काठमाडौं । कुमारी बैंक लिमिटेडले नेपाल सरकार तथा आन्तरिक राजस्व विभागको करदाता प्रोत्साहन कार्यक्रमलाई सहयोग गर्ने उद्देश्यले आफ्नो मोबाइल बैंकिङ एपमा आन्तरिक राजस्व विभागको प्रोत्साहन कार्यक्रम सुविधा उपलब्ध गराएको छ ।
आर्थिक वर्ष २०८३/८४ को बजेटमार्फत सुरु गरिएको यस कार्यक्रमले उपभोक्तालाई स्थायी लेखा नम्बर तथा मूल्य अभिवृद्धि करको बिल लिन प्रोत्साहित गर्नुका साथै विद्युतीय भुक्तानी, कर अनुपालन र वित्तीय पारदर्शिता प्रवर्द्धन गर्ने लक्ष्य राखेको छ ।
यस सुविधाअन्तर्गत कुमारी बैंकका ग्राहकले नेपालभित्र व्यक्तिगत प्रयोजनका लागि एक सय रुपैयाँभन्दा बढीको वस्तु वा सेवा खरिद गरी व्यापारीको विद्युतीय संकेतमार्फत भुक्तानी गर्दा स्वतः पुरस्कार योजनामा सहभागी हुन सक्नेछन्। ग्राहकले कुमारी स्मार्ट मोबाइल बैंकिङ एपको आन्तरिक राजस्व विभाग प्रोत्साहन कार्यक्रम मेनुमार्फत योग्य कारोबारको सङ्ख्या, कारोबार विवरण तथा पुरस्कार प्राप्त गरेको अवस्था सहजै हेर्न सक्नेछन् ।
आन्तरिक राजस्व विभागको व्यवस्थाअनुसार योग्य कारोबारमध्ये दैनिक रूपमा चिट्ठामार्फत एक जना ग्राहकले कर कट्टीपश्चात् एक लाख रुपैयाँ नगद पुरस्कार प्राप्त गर्नेछन्। त्यस्तै, प्रत्येक १५ दिनमा एक जना भाग्यशाली ग्राहकले १० लाख रुपैयाँ बराबरको बम्पर पुरस्कार प्राप्त गर्ने व्यवस्था गरिएको छ ।
कुमारी बैंकले ग्राहकलाई व्यापारीको विद्युतीय संकेतमार्फत भुक्तानी गर्न, स्थायी लेखा नम्बर तथा मूल्य अभिवृद्धि करको बिल लिन, बिल सुरक्षित राख्न र नियमित रूपमा आन्तरिक राजस्व विभागको प्रोत्साहन कार्यक्रममार्फत आफ्नो योग्यताको अवस्था जाँच गर्न आग्रह गरेको छ ।
बैंकले यस अभियानले विद्युतीय कारोबार विस्तार गर्नुका साथै नगदरहित अर्थतन्त्र निर्माण, कर अनुपालन वृद्धि तथा वित्तीय पारदर्शितालाई थप सुदृढ बनाउन महत्वपूर्ण योगदान पुर्याउने विश्वास व्यक्त गरेको छ ।
विगत २५ वर्षदेखि निरन्तर बैंकिङ सेवा प्रदान गर्दै आएको कुमारी बैंक लिमिटेडले हाल देशभर फैलिएका २८५ शाखा, ४१ विस्तारित काउन्टर, ३०२ एटीएम तथा ४० शाखारहित बैंकिङ एकाइमार्फत लाखौँ ग्राहकलाई सेवा दिँदै आएको छ । बैंकले नेपालका विभिन्न स्थानमा बसोबास गर्ने नागरिकलाई सहज, सुरक्षित तथा गुणस्तरीय बैंकिङ सेवा उपलब्ध गराउने प्रतिबद्धतासहित सहरी, अर्धसहरी तथा ग्रामीण क्षेत्रमा आफ्नो सेवा विस्तार गर्दै आएको जनाएको छ ।
