एजेन्सी । जर्मनीको लाइपजिग/हाले विमानस्थलमा विस्फोटक पदार्थ जडान गरिएको ड्रोन फेला परेपछि त्यसलाई सुरक्षित रूपमा निष्क्रिय गरिएको छ। घटनापछि जर्मनीले यसलाई देशको हवाई सुरक्षासामु देखा परेको नयाँ प्रकारको सुरक्षा चुनौतीका रूपमा लिएको छ ।
मंगलबार राति विमानस्थल आसपास शंकास्पद उड्ने वस्तु देखिएपछि प्रमुख कार्गो केन्द्रका दुवै रनवे अस्थायी रूपमा बन्द गरिएका थिए। त्यसका कारण एउटा यात्रुवाहक विमानसहित केही उडानहरू वैकल्पिक विमानस्थलतर्फ मोडिएका थिए ।
क्षेत्रीय प्रहरी र सरकारी अभियोजन कार्यालयका अनुसार विमानस्थलका एक कर्मचारीले दक्षिणी रनवे नजिक अज्ञात विस्फोटक उपकरण बोकेको ड्रोन फेला पारेपछि सुरक्षा निकाय परिचालन गरिएको थियो। विस्फोटक निष्क्रिय पार्ने रोबोट प्रयोग गरी ड्रोनमा जडान गरिएको डेटोनेटर हटाएर सुरक्षित रूपमा निष्क्रिय पारिएको छ। घटनाबारे विस्तृत अनुसन्धान जारी रहेको जनाइएको छ।
जर्मनीका गृहमन्त्री अलेक्जान्डर डोब्रिन्डले विमानस्थलमा विस्फोटकयुक्त ड्रोन भेटिनु हवाई सुरक्षाका लागि ‘खतराको नयाँ गुणस्तर’ भएको बताए। उनले यसलाई सम्भावित ‘हाइब्रिड आक्रमण’ को संकेत हुन सक्ने उल्लेख गर्दै ड्रोनको स्रोत, प्रयोग गरिएको विस्फोटक र सम्भावित संलग्न व्यक्तिबारे अनुसन्धान भइरहेको जानकारी दिए ।
स्याक्सोनी राज्यका गृहमन्त्री आर्मिन सुस्टरका अनुसार सुरक्षा निकायले सम्भावित दोस्रो ड्रोनका अवशेष वा अन्य प्रमाणसमेत खोजिरहेको छ।
घटनाका कारण अवतरण गर्न नसकेको एउटा मालवाहक विमानलाई करिब २०० किलोमिटर टाढाको हनोभर विमानस्थलमा अवतरण गराइएको थियो। निरीक्षणका क्रममा विमानमा सामान्य क्षति देखिएको अधिकारीहरूले बताएका छन्।
लाइपजिग/हाले विमानस्थलको उत्तरी रनवे करिब दुई घण्टापछि पुनः सञ्चालनमा ल्याइएको थियो भने दक्षिणी रनवे पूर्वनिर्धारित मर्मतका कारण बुधबार पनि बन्द रहने तय गरिएको थियो। घटनाबाट यात्रु वा विमानस्थलका कर्मचारीलाई कुनै प्रत्यक्ष क्षति नभएको र नियमित उडान सञ्चालनमा ठूलो असर नपरेको जनाइएको छ।
युरोपकै प्रमुख कार्गो केन्द्रमध्ये एक मानिने लाइपजिग/हाले विमानस्थलमा युक्रेनी एन्टोनोभका मालवाहक विमानहरूको नियमित आवागमन हुने गर्छ। घटनास्थलबाट सार्वजनिक तस्बिरमा एन्टोनोभ विमान नजिकै विस्फोटक निष्क्रिय पार्ने रोबोटसहित सुरक्षा प्राविधिक परिचालित भएको देखिएको छ।
यस घटनाबारे उत्तर एटलान्टिक सन्धि संगठन (नाटो) ले पनि जानकारी लिएको जनाएको छ। नाटोले थप विवरणका लागि जर्मन अधिकारीहरूसँग समन्वय गरिरहेको बताएको छ।
यसअघि सन् २०२४ मा पनि यही विमानस्थलको लजिस्टिक केन्द्रमा आगो लगाउने उपकरण प्रयोग गरिएको घटना भएको थियो । पश्चिमी सुरक्षा अधिकारीहरूले उक्त घटनालाई रूसी गुप्तचर निकायसँग जोडिएको सम्भावित तोडफोड अभियानको हिस्सा हुन सक्ने आशंका व्यक्त गरेका थिए।
