काठमाडौं । सरकारले आर्थिक वर्ष २०८२/८३ को असार २४ गतेसम्म पाँच लाख ६१ हजार ४९३.८५ मेट्रिकटन रासायनिक मल आपूर्ति गरेको जनाएको छ ।
यो परिमाण वार्षिक छ लाख मेट्रिकटन आपूर्तिको लक्ष्यको करिब ९४ प्रतिशत हो ।
कृषि तथा पशुपन्छी विकास मन्त्रालयका अनुसार गत आर्थिक वर्षका लागि २८ अर्ब ८२ करोड १४ लाख बजेट विनियोजन गरिएको थियो । गत असार २४ गतेसम्म चार लाख ९१ हजार ३०० मेट्रिकटन रासायनिक मल खरिदका लागि टेण्डर प्रक्रिया सम्पन्न भएको छ ।
उक्त मन्त्रालयकाअनुसार हालसम्म दुई कम्पनीमार्फत तीन लाख २७ हजार ५७९.८० मेट्रिकटन युरिया, दुई लाख तीन हजार ४२६.३० मेट्रिकटन डीएपी तथा ३० हजार ४८७.७५ मेट्रिकटन पोटास गरी कुल पाँच लाख ६१ हजार ४९३.८५ मेट्रिकटन रासायनिक मल आपूर्ति गरिएको छ ।
उक्त अवधिसम्म देशभरका गोदाममा ९२ हजार ५९२.३५ मेट्रिकटन रासायनिक मल मौज्दात थियो । त्यसमध्ये ४९ हजार १०४ दशमलव ३० मेट्रिकटन युरिया, २४ हजार १२.८५ मेट्रिकटन डिएपी र १९ हजार ४७५.२० मेट्रिकटन पोटास मौज्दात थियो ।
अघिल्लो आर्थिक वर्षको मौज्दातसमेत समावेश गरी असार २४ गतेसम्म पाँच लाख १८ हजार २७८.५५ मेट्रिकटन रासायनिक मल बिक्री भएको छ । तीन लाख सात हजार १६.६० मेट्रिकटन युरिया, एक लाख ९२ हजार ९३१.१५ मेट्रिकटन डिएपी र १८ हजार ३३० दशमलव ८० मेट्रिकटन पोटास बिक्री भएको उक्त मन्त्रालयले जनाएको छ ।
बाह्य मार्गमा २८८.७५ मेट्रिकटन रासायनिक मल ढुवानीको क्रममा छ, जसमा ८६.०५ मेट्रिकटन युरिया र २०२.७० मेट्रिकटन डिएपी छ ।
