काठमाडौं । नेपालमा दिपल ब्रान्डको नयाँ विद्युतीय एसयूभी दिपल नियो क्यू-फाइभ (Deepal Neo Q05) सार्वजनिक हुने तयारीमा छ। आकर्षक डिजाइन, अत्याधुनिक प्रविधि, फराकिलो इन्टेरियर र अन्तर्राष्ट्रिय बजारमा प्राप्त सफलताका कारण यो मोडल नेपाली बजारमा बहुप्रतीक्षित बनेको हो।
नेपालका लागि दिपलको आधिकारिक वितरक एमएडब्लू वृद्धि ले नयाँ विद्युतीय एसयूभी नियो क्यू-फाइभ छिट्टै सार्वजनिक गर्ने तयारी गरेको जनाएको छ। कम्पनीका अनुसार यो मोडलले स्टाइल, आराम, उपयोगिता र स्मार्ट प्रविधिको संयोजन प्रस्तुत गर्दै नेपाली ईभी बजारमा नयाँ मापदण्ड स्थापित गर्ने अपेक्षा गरिएको छ। यद्यपि नेपालमा उपलब्ध हुने भेरियन्ट, प्राविधिक विवरण र मूल्यबारे भने कम्पनीले अझै आधिकारिक जानकारी सार्वजनिक गरेको छैन।
दिपल नियो क्यू-फाइभ पहिलो नजरमै आधुनिक र आत्मविश्वासी डिजाइनका कारण आकर्षक देखिन्छ। यसको विशिष्ट प्रकाश प्रणाली, सन्तुलित बाह्य बनावट र प्रभावशाली रोड प्रिजेन्स अन्तर्राष्ट्रिय रूपमा चर्चित अटोमोबाइल डिजाइनर क्लाउस जाइस्योराको नेतृत्वमा विकसित गरिएको हो। उत्कृष्ट डिजाइनका कारण यसले सन् २०२६ को प्रतिष्ठित गोल्ड ए डिजाइन अवार्ड समेत जितिसकेको छ।
सहरी सडकलाई ध्यानमा राखेर तयार गरिएको यो एसयूभीमा २,७३५ मिलिमिटरको ह्विलबेस रहेको छ, जसले यात्रुका लागि प्रशस्त लेगस्पेस र पर्याप्त बुट स्पेस उपलब्ध गराउँछ। भीडभाडयुक्त सहरमा सहज रूपमा चलाउन सकिने आकारसँगै पारिवारिक प्रयोगका लागि पनि यो उपयुक्त हुने कम्पनीको दाबी छ।
स्मार्ट प्रविधिका हिसाबले पनि नियो क्यू-फाइभ निकै सक्षम मानिएको छ। चीनको भित्री मंगोलियास्थित याकेशीमा गरिएको परीक्षणका क्रममा यसले अत्यधिक चिप्लो र बरफयुक्त सडकमा पनि बुद्धिमानी ड्राइभिङ क्षमता प्रदर्शन गरेको थियो। साथै यसमा सीटीएल (CATL) को ब्याट्री प्रयोग गरिएको छ, जसले उच्च गतिको चार्जिङ सुविधा प्रदान गर्छ।
दिपल नियो क्यू-फाइभले चीनमा सार्वजनिक भएदेखि नै उल्लेखनीय व्यापारिक सफलता हासिल गरेको छ। कम्पनीका अनुसार यो वर्ष जुन महिनाको अन्त्यसम्म मात्रै चीनमा यसका ७६ हजारभन्दा बढी युनिट बिक्री भइसकेका छन्, जसले यसलाई आफ्नो वर्गकै लोकप्रिय विद्युतीय एसयूभीमध्ये एक बनाएको छ।
अन्तर्राष्ट्रिय बजारमा डिजाइन, प्रविधि र प्रदर्शनका आधारमा लोकप्रिय बनेको दिपल नियो क्यू-फाइभ अब नेपाली बजारमा पनि चाँडै सार्वजनिक हुने तयारीमा छ। यसको आधिकारिक मूल्य, भेरियन्ट, फिचर र सम्पूर्ण प्राविधिक विवरण भने सार्वजनिक कार्यक्रममा घोषणा गरिने कम्पनीले जनाएको छ।
