सुनसरी । रामाडा बाइ विन्डह्याम इटहरीले पूर्वी नेपालको पर्यटन प्रवर्धनलाई प्राथमिकतामा राख्दै प्राकृतिक सौन्दर्य, वन्यजन्तु, चरा अवलोकन तथा सांस्कृतिक सम्पदालाई देशविदेशका पर्यटकमाझ चिनाउने अभियान अघि बढाएको छ ।
सन् २०२६ जनवरीदेखि सञ्चालनमा आएको विन्डह्याम होटल्स एन्ड रिसोर्ट्सअन्तर्गतको रामाडा इटहरीले होटलमा बसोबासको सुविधा प्रदान गर्नुका साथै पूर्वी नेपालका पर्यटकीय गन्तव्यको प्रचारप्रसारलाई आफ्नो प्रमुख उद्देश्य बनाएको जनाएको छ । होटलले सञ्चालनमा आउनुअघि नै सामाजिक सञ्जालमार्फत यस क्षेत्रका पर्यटकीय सम्भावना उजागर गर्न थालेको थियो ।
होटललाई औपचारिक रूपमा साँचो हस्तान्तरण गर्ने कार्यक्रम गत मार्चमा सम्पन्न भएको थियो । कार्यक्रममा विन्डह्याम होटल्स एन्ड रिसोर्ट्सका युरेसिया क्षेत्रका सञ्चालन प्रमुख अनिमेश कुमारले होटलको भ्रमण गरी औपचारिक रूपमा साँचो हस्तान्तरण गरेका थिए । होटलका अध्यक्ष देशबन्धु बस्नेतलगायत टोलीको उपस्थितिमा कार्यक्रम सम्पन्न भएको थियो ।
रामाडाले पूर्वी नेपालको पर्यटन प्रवर्धन गर्ने क्रममा कोशीटप्पु वन्यजन्तु आरक्षलाई विशेष प्राथमिकता दिएको छ । जैविक विविधता र विभिन्न प्रजातिका चराचुरुङ्गीका लागि परिचित आरक्षको महत्त्व प्रचारप्रसार गर्न होटलले आरक्षका संरक्षण अधिकृत भूपेन्द्र यादवसँग सहकार्य गरिरहेको छ ।
यसै अभियानअन्तर्गत होटलले ‘कोशीटप्पु वाइल्डरनेस एस्केप’ नामक विशेष पर्यटकीय प्याकेजसमेत सञ्चालनमा ल्याएको छ । उक्त प्याकेजमार्फत पाहुनाले पूर्वी नेपालको प्राकृतिक सम्पदा अन्वेषण गर्ने अवसर पाउने होटलले जनाएको छ ।
पूर्वी नेपालमा वन्यजन्तु अवलोकन, चरा अवलोकन, सांस्कृतिक सम्पदा र प्राकृतिक दृश्यावलोकनका प्रशस्त सम्भावना रहेकाले होटलले प्रचलित पर्यटकीय मार्गभन्दा बाहिरका गन्तव्यसमेत पर्यटकमाझ चिनाउने लक्ष्य राखेको छ । सामाजिक सञ्जाल तथा अन्य सञ्चार माध्यममार्फत ती गन्तव्यको प्रचारप्रसारलाई निरन्तरता दिइरहेको होटलको भनाइ छ ।
पर्यटन प्रवर्धनसँगै रामाडाले खानपान सेवामार्फत पनि आफ्नो पहिचान विस्तार गरिरहेको छ । होटलका रेस्टुरेन्ट तथा खानपान सेवाले होटलमा बस्ने पाहुनाका साथै स्थानीय ग्राहकलाई समेत आकर्षित गरिरहेका छन् । यसले होटललाई आवासको सुविधामा सीमित नराखी खानपान र मनोरञ्जनका लागि समेत आकर्षक गन्तव्यका रूपमा स्थापित गर्न सहयोग पुर्याएको छ ।
होटलले आफ्नै सेवा तथा सुविधाको प्रचारसँगै समग्र पूर्वी नेपालको पर्यटन विकासलाई जोड दिएको छ । गन्तव्य प्रवर्धन, स्थानीय सरोकारवालासँगको सहकार्य र विविध खानपानका अनुभवमार्फत यात्रुहरूलाई पूर्वी नेपाल भ्रमण गर्न प्रेरित गर्ने उद्देश्य रहेको होटलले जनाएको छ ।
पूर्वी नेपालमा पर्यटनको सम्भावना विस्तार हुँदै गर्दा रामाडा बाइ विन्डह्याम इटहरीले यस क्षेत्रको आतिथ्य सेवामा आफ्नो भूमिका थप सुदृढ बनाउने लक्ष्य लिएको छ । होटल स्थापनालाई व्यावसायिक विस्तारमा मात्र सीमित नराखी पूर्वी नेपालको प्राकृतिक तथा सांस्कृतिक पहिचानलाई राष्ट्रिय र अन्तर्राष्ट्रिय स्तरमा चिनाउने प्रयासका रूपमा अघि बढाइएको जनाइएको छ ।
