काठमाडौँ । दुग्ध विकास संस्थान (डीडीसी)ले किसानलाई ४८ करोड रुपैयाँ भुक्तानी गरेको छ । डीडीसीले वैशाखमा दुग्धजन्य पदार्थको बिक्री बढेसँगै १३ दिनमा ४८ करोड रकम भुक्तानी गरेको हो ।
संस्थानका निमित्त महाप्रबन्धक राजेन्द्रप्रसाद अधिकारीले गर्मी याम प्रारम्भ भएसँगै दुग्धजन्य पदार्थ (दूध, दही, मोही, पनिर, लसी, आइसक्रिम)को बिक्री बढेकाले किसानको रकम भुक्तानी गर्न सहज भएको जानकारी दिए ।
‘गर्मीमा दुग्धजन्य पदार्थको बिक्री ५० प्रतिशतले बिक्री बढेकाले नगद प्रवाह बढेको र कृषकको भुक्तानी लगायत अन्य भुक्तानीमा क्रमिक रूपले सहज भएको छ,’ उनले भने ।
डीडीसीले वैशाख लागेपछि विराटनगर क्षेत्रमा १० करोड, जनकपुर क्षेत्रमा एक करोड, हेटौँडा क्षेत्रमा आठ करोड, लुम्बिनी क्षेत्रमा चार करोड २५ लाख, नेपालगन्ज क्षेत्रमा दुई करोड ७५ लाख, धनगढी क्षेत्रमा एक करोड ५० लाख र काठमाडौँ क्षेत्रमा १३ करोड किसानको रकम भुक्तानी गरेको जनाएको छ ।
डीडीसीले हेटौँडामा सञ्चालन गरेको डीडीसी पशु आहारा उद्योगबाट किसानले दाना खरिद गरी पैसा भुक्तानी गर्न बाँकी ६ करोड रकम कट्टासमेत गरेको निमित्त महाप्रबन्धक अधिकारीले बताए । डीडीसीको हेटौँडामा सञ्चालित पशु आहारा उद्योगबाट मासिक पाँच लाख किलो दाना उत्पादन हुँदै आएको छ ।
