काठमाडौं । कार्टुनिस्ट रवि मिश्र र अकृनले बनाएका क्यारिकेचरहरुको प्रदर्शनी ‘कर्पोरेट लिडर्स क्यारिकेचर्स २०२५’ हाल नेपाल आर्ट काउन्सिल, बबरमहलमा जारी छ । व्यावसायिक नेतृत्वलाई कलात्मक ढंगले प्रस्तुत गर्ने उद्देश्यले आयोजना गरिएको यस प्रदर्शनीमा मुलुकका ३१ जना व्यवसायिक नेतृत्वका कार्टुन क्यारिकेचरहरू प्रदर्शित छन् ।
प्रत्येक क्यारिकेचर सम्बन्धित नेतृत्वको व्यवसाय वा उत्पादनसँग जोडिएको छ, जसले प्रदर्शनीलाई थप रोचक बनाएको छ । उदाहरणका लागि, विनोद चौधरी वाइवाइ खाइरहेका देखिन्छन् भने अरुण चौधरी सुजुकी मोटर्स हाँकी रहेका छन् ।
देवीप्रकाश भट्टचनलाई हेलिकप्टरमा सवार देखाइएको छ भने पशुपति मुरारकालाई अर्घाखाँची सिमेन्टको बोरासँग अडेस लागिरहेका दृश्यमा उतारिएको छ ।
यस्तै, पवन गोल्यान फर्सी टिपिरहेका छन्, एनसेलका सिइओ जबोर कयुमव फोनमा व्यस्त देखिन्छन् भने कुशकुमार जोशीलाई निक ट्रान्सफर्मरको अगाडि केही लेख्दै गरेको देखाइएको छ ।
यस्ता जीवन्त र विषयगत चित्रणहरूले दर्शकलाई मुस्कान ल्याउने मात्र होइन, व्यावसायिक क्षेत्रको वास्तविकतालाई समेत झल्काउने काम गरेका छन् ।
प्रदर्शनी ‘कर्पोरेट नेपाल’ को आयोजनामा सम्पन्न भएको हो । यसअघि यो प्रदर्शनी ललितपुरको ‘दि प्लाजा’ मा सम्पन्न भइसकेको थियो । नेपाल आर्ट काउन्सिलमा जारी प्रदर्शनी भोलिसम्म खुला रहनेछ ।
कलात्मक सृजनामार्फत कर्पोरेट नेतृत्वलाई अनौपचारिक ढंगले प्रस्तुत गर्ने यस शैलीले नेपाली क्यारिकेचर विधालाई नयाँ स्वाद दिएको छ ।
