काठमाडौं । सर्वोच्च अदालतले पाथीभरा केबलकारको काम यथास्थितिमा राख्न आदेश दिएको छ । ताप्लेजुङको पाथीभरामा केबलकार निर्माणलगायतका काम तत्कालका लागि यथास्थितिमा राख्न सर्वोच्चले सरकार तथा निर्माण कम्पनीका नाममा आदेश दिएको हो ।
यामबहादुर लिम्बूलगायतले दायर गरेको रिट निवेदनमाथिको प्रारम्भिक सुनुवाइपछि सर्वोच्चले अन्तरिम आदेशको टुंगो नलाग्दासम्म सबै काम-कारबाहीलाई यथास्थितिमा राख्न आदेश दिएको छ । गएको बुधबार न्यायाधीश शारंगा सुवेदीको इजलासले अन्तरिम आदेश जारी गर्ने वा नगर्ने भन्नेबारे छलफल गर्न चैत २६ गते दुवै पक्षलाई झिकाएको छ ।
निवेदनमा उठाइएको विषयवस्तुको प्रकृति र गम्भीरता हेर्दा दुवै पक्षको छलफलपछि मात्रै अन्तरिम आदेशबारे निर्णय गर्न उपयुक्त हुने भन्दै न्यायाधीश सुवेदीको इजलासले चैत २६ मा दुवै पक्षलाई झिकाएको हो । निवेदक लिम्बूलगायतले पाथीभरामा केवलकार निर्माण गर्न नहुने भन्दै निर्माणको निर्णय र त्यससँग सम्बन्धित सबै काम बदर गर्न माग गर्दै सर्वोच्चमा मुद्दा दर्ता गरेका थिए ।
