काठमाडौं । एनसेल फाउन्डेसनले पूर्वघोषणाअनुसार नेपाल प्रिमियर लिग (एनपीएल)का खेलहरुमा हानिएका प्रत्येक चौकाबापत विद्यार्थीलाई चारवटा शैक्षिक सामग्री वितरण सुरु गरेको छ । कार्यक्रमअन्तर्गत मंगलबार लुम्बिनी प्रदेशका तीन विद्यालयमा ४४६ वटा शैक्षिक सामग्री वितरण गरिएको छ ।
क्रिकेटदेखि कक्षाकोठासम्मको यो पहलमा क्रिकेटको रोमाञ्चकतालाई शिक्षासँग जोड्दै एनसेलले एनपीएलका खेलमा हानिने प्रत्येक चौकाबापत चारवटा शैक्षिक सामग्री वितरण गर्ने घोषणा मंसिरमा गरेको थियो । यसले विद्यार्थीमा अर्थपूर्ण प्रभाव पार्दै शिक्षामा सकारात्मक परिवर्तन ल्याउन योगदान पुर्याउने उद्देश्य राखेको छ ।
एनसेलका प्रमुख कार्यकारी अधिकृत जाब्बोर कायुमोभ, नेपाल क्रिकेट संघ (क्यान)का सचिव पारस खड्का, लुम्बिनी लायन्सका अध्यक्ष ईश्वर जिसी र एनसेलकी मार्केटिङ, कम्युनिकेसन एन्ड सस्टेनिबिलिटी अन्तरिम डाइरेक्टर विषाखालक्ष्मी खड्काले कपिलवस्तु नगरपालिका वडा नम्बर १० का श्री राष्ट्रिय माध्यमिक विद्यालय र मदरसा वहरुल उलुमका २६० जना विद्यार्थीलाई मंगलबार शैक्षिक सामग्री वितरण गरेका छन् ।
त्यसैगरी मंगलबार नै एनसेलका चिफ अफ स्टाफ स्टिवन रोड्रिगेजले राप्ति सोनारी गाँउपालिका, वडा नम्बर ४ मा रहेको श्री बालकशान्ति प्राथमिक विद्यालयका विद्यार्थीलाई १८६ शैक्षिक सामग्री वितरण गरेका छन् ।
‘प्रतिबद्धताबमोजिम प्राथमिक तहका विद्यार्थीलाई एनसेल फाउन्डेसनमार्फत शैक्षिक सामग्री सहयोग प्रदान गर्न पाउँदा खुसी छौं । गुणस्तरीय शिक्षा प्रत्येक बालबालिकाको आधारभूत अधिकार हो । यो पहलले विद्यार्थीलाई शिक्षामा मद्दत गर्ने विश्वास मैले लिएको छु र साथै यसले शैक्षिक स्रोतको अभाव कम गर्न सहयोग गर्छ,’ एनसेलका प्रमुख कार्यकारी अधिकृत कायुमोभले भने ।
विद्यार्थीले प्राप्त गरेका प्रत्येक शैक्षिक सामग्रीमा स्कुल ब्याग, कापी, सिसाकलम, इरेजर, कटरलगायतका स्टेसनरी सामान समावेश छन् । ‘यो एक उत्कृष्ट पहल हो, जसमा शिक्षालाई क्रिकेटसँग जोड्दै एनसेलले व्यावसायिक सामाजिक जिम्मेवारी (सीएसआर) अन्तर्गत विद्यार्थीलाई उनीहरूको शिक्षामा सहयोग पुर्याउँछ । कपिलवस्तुमा आयोजित शैक्षिक सामग्री वितरण कार्यक्रममा बच्चाहरूसँग समय बिताउँदै र उनीहरुसँग खुसी बाँड्दै सहभागी हुन पाउँदा म अत्यन्तै खुसी छु,’ क्यानका सचिव खड्काले भने ।
यस पहलअन्तर्गत एनसेल फाउन्डेसनले एनपीएलमा हानिएका ६५३ चौकाबापत कुल २ हजार ६१२ वटा शैक्षिक सामग्री विद्यार्थीलाई वितरण गर्नेछ । कपिलवस्तुका दुई विद्यालयले एनसेल फाउन्डेसनको फेसबुक पेजबाट यस पहलका बारेमा थाहा पाएपछि एनसेल फाउन्डेसनसँग सहयोगका लागि अनुरोध गरेका थिए भने श्री बालकशान्ति विद्यालयले एनसेलको नेपालगन्ज कार्यालयमार्फत सहयोगका लागि अनुरोध गरेको थियो ।
‘हामी यस पहलप्रति प्राप्त व्यापक उत्साहजनक प्रतिक्रियाबाट उत्साहित छौं । शैक्षिक सामग्री वितरणको कामलाई निरन्तरता दिदै क्यान जस्ता सम्बन्धित साझेदारसँगको सहकार्यमा देशका अन्य भागका विद्यार्थीलाई पनि शैक्षिक सामग्री उपलब्ध गराउनेछौं,’ एनसेलकी मार्केटिङ, कम्युनिकेसन एन्ड सस्टेनिबिलिटी अन्तरिम डाइरेक्टर खड्काले भनिन् ।
एनपीएलका लागि एनसेलको साझेदारी र प्रत्येक चौकाबापत चारवटा शैक्षिक सामग्री वितरण कम्पनीको ‘हामी तपाईंकै लागि’ भन्ने थिम र नेपालमा क्रिकेट र खेलकुदको विकासमा समर्थन गर्ने प्रतिबद्धताअनुरुप रहेको थियो । एनसेल फाउन्डेसन महत्वपूर्ण सामाजिक आवश्यकताहरू पूरा गर्न प्रभावकारी पहलमार्फत समुदायहरूको समृद्धिमा योगदान पुर्याउन प्रतिबद्ध रहेको विज्ञप्तिमा उल्लेख छ ।
