काठमाडौं । चीनको छेन्दुबाट पोखरा अन्तर्राष्ट्रिय विमानस्थलमा अब नियमित उडान हुने भएको छ । सिचुआन प्रान्तको सहयोगमा सिचुआन एयरलाइन्सले भोलि मंगलबारदेखि पोखरा अन्तर्राष्ट्रिय विमानस्थलमा नियमित व्यावसायिक चार्टर उडान गर्ने भएको हो ।
नेपाल-चीन कूटनीतिक सम्बन्ध स्थापनाको ७० वर्ष पुगेको अवसरमा हुन लागेको नियमित उडानलाई महत्वका साथ हेरिएको छ । नेपाल पर्यटन बोर्डले यस उडानले नेपाल र चीनबीचको हवाई सम्पर्कलाई अझ प्रभावकारी बनाउँदै पर्यटन प्रवर्धन, सांस्कृतिक आदानप्रदान र व्यावसायिक सहकार्यलाई नयाँ उचाइमा पुऱ्याउने विश्वास लिएको छ ।
‘पोखरा-छेन्दु उडानले मध्य र पश्चिम नेपालका यात्रुका लागि कम खर्चमा सहज पहुँचका साथै चिनियाँ पर्यटकलाई सुन्दर सहर पोखराको अवलोकनको अवसर प्रदान गर्नेछ,’ बोर्डले जारी गरेको विज्ञप्तिमा भनिएको छ ।
पर्यटकीय राजधानीसँगको सीधा हवाई सम्पर्कले चीन सरकारले घोषणा गरेको भिजिट नेपाल २०२५ र नेपाल सरकारले घोषणा गरेको पोखरा पर्यटन वर्ष अभियानलाई टेवा पुऱ्याउने बोर्डको विश्वास छ । साथै यसले नेपालमा अन्तर्राष्ट्रिय पर्यटकको आगमन वृद्धि गर्न महत्त्वपूर्ण भूमिका खेल्ने पनि विज्ञप्तिमा उल्लेख छ ।
बोर्डले हवाई उडानबाट दुई देशका सहर जोडिँदा आपसी मित्रता र सहकार्य थप बलियो हुने जनाएको छ । छेन्दुबाट पोखरामा आउने सिचुवान एयरलाइन्समार्फत मंगलबार हुने व्यावसायिक चार्टर उडानमा नेपाली प्रतिनिधि मण्डल ‘पोखरा-छेन्दु फ्लाइट प्रमोसन एन्ड चाइना (सिचुआन) सेल्स मिसन २०२५’ का लागि जानेछ ।
नेपाली प्रतिनिधि मण्डलले छेन्दु, लुझाउ, लेसानलगायतका चिनियाँ सहरमा हुने विभिन्न सरकारी तथा निजी क्षेत्रका प्रतिनिधि मण्डलसँग व्यावसायिक बैठकमा सहभागिता जनाउनेछ। ‘यी प्रयासले नेपाललाई प्रमुख पर्यटन गन्तव्यका रूपमा प्रवर्धन गर्नुका साथै दुवै देशका पर्यटन क्षेत्रमा सहकार्यलाई सुदृढ बनाउन भूमिका खेल्नेछ,’ बोर्डको विज्ञप्तिमा उल्लेख छ ।
