काठमाडौं । सेयर बजार बजार परिसूचक नेप्से बिहीबार १८ अंकले घटेको छ । व्यापारबाहेकका सबै समूह ओरालो लागेपछि समग्र बजार परिसूचक १८.११ अंकले घटेर २०४५.८३ अंकमा झरेको हो ।
मंगलबारदेखि बजार लगातार घटिरहेको छ । मंगलबार नेप्से ६.२४ र बुधबार ३.३४ अंकले घटेको थियो ।
बजार घट्दा १९८ कम्पनीका लगानीकर्ताले आज गुमाएका छन् । त्यस्तै ४१ कम्पनीका लगानीकर्ताले कमाउँदा सर्वोत्तम सिमेन्टको सेयर मूल्यमा सकारात्मक सर्किट लागेको छ । सर्वोत्तमको मूल्यमा लगातार तेस्रो दिन सर्किट लागेको हो ।
सर्वाधिक कमाउनेको अग्र सूचीमा धौलागिरि लघुवित्त, किसान लघुवित्त र कर्णाली डेभलपमेन्ट बैंक पनि छन् ।
आज १ अर्ब २१ करोड ३२ लाख ८१ हजार रुपैयाँबराबरको माछापुच्छ्रे बैंकको संस्थापक सेयर किनबेच भएको छ । जसका कारण कारोबार रकममा बढोत्तरी देखिएको छ । आज ४ अर्ब १३ करोडको सेयर किनबेच भयो ।
