एजेन्सी । साउदी अरबका विभिन्न क्षेत्रमा हुथी समूहका आक्रमणपछि अस्ट्रेलिया सरकारले आफ्ना नागरिकलाई रियादस्थित किङ खालिद अन्तर्राष्ट्रिय विमानस्थलमा यात्रा नगर्न आग्रह गरेको छ ।
क्षेत्रीय सुरक्षा अवस्था बिग्रिँदै गएको जनाउँदै अस्ट्रेलियाको विदेश मामिला तथा व्यापार विभागले आफ्नो आधिकारिक यात्रा परामर्श सेवा ‘स्मार्टट्राभलर’ मार्फत नागरिकलाई साउदी अरब भ्रमणसम्बन्धी सावधानी अपनाउन र यात्राको आवश्यकताबारे पुनर्विचार गर्न सुझाव दिएको हो ।
विभागका अनुसार पछिल्ला सुरक्षा घटनाका कारण विमानस्थलको सञ्चालन प्रभावित हुन सक्ने तथा क्षेत्रीय सैन्य द्वन्द्वका कारण हवाई क्षेत्र बन्द हुने, आवागमनमा प्रतिबन्ध लाग्ने र उडान रद्द हुने सम्भावना छ । यस्तो अवस्थामा यात्रुहरूको आवागमन र सुरक्षामा चुनौती थपिन सक्ने विभागले जनाएको छ ।
विमानस्थल हुँदै यात्रा गर्ने निर्णय गरेका अस्ट्रेलियाली नागरिकलाई भने आफ्नो उडानको अवस्थाबारे सम्बन्धित विमान सेवा कम्पनी वा यात्रा व्यवस्थापकसँग पुनः पुष्टि गर्न आग्रह गरिएको छ । साथै, विमानस्थलमा अनावश्यक रूपमा लामो समय नबस्न पनि सुझाव दिइएको छ ।
विभागले नागरिकलाई सतर्क रहन, आफ्नो सुरक्षालाई प्राथमिकता दिन, घटनाक्रमबारे नियमित जानकारी लिन र स्थानीय अधिकारीहरूको निर्देशन पालना गर्न आग्रह गरेको छ । सम्भावित आक्रमणको जोखिमलाई ध्यानमा राख्दै सैन्य अखडा तथा ऊर्जा पूर्वाधारबाट टाढा रहन र आक्रमण भएमा सुरक्षित बन्द स्थानमा आश्रय लिनसमेत सुझाव दिइएको छ ।
यसैबीच, अस्ट्रेलिया सरकारले साउदी अरबका दक्षिणी प्रान्त असिर, जिजान र नजरानमा यात्रा नगर्न दिएको चेतावनीलाई निरन्तरता दिएको छ । यमनसँगको सीमाबाट ३० किलोमिटरभित्र पर्ने कुनै पनि क्षेत्रमा यात्रा नगर्न पनि आफ्ना नागरिकलाई आग्रह गरिएको छ ।
साउदी अरब र यमन आसपासको क्षेत्रीय सुरक्षा अवस्थाले अन्तर्राष्ट्रिय हवाई सेवा तथा यात्रुहरूको सुरक्षामा पार्न सक्ने प्रभावलाई ध्यानमा राख्दै अस्ट्रेलियाले आफ्नो यात्रा परामर्श अद्यावधिक गरेको हो ।
