पर्सा । चिसो अत्यधिक बढेपछि वीरगन्ज महानगरपालिकाले आजदेखि तीन दिन महानगरभित्रका विद्यालयको पठनपाठन बन्द गर्ने निर्णय गरेको छ । पछिल्ला दिन जिल्लामा बाक्लो हुस्सु लाग्न थालेको छ । महानगरले पुस २४ देखि २६ सम्म तीन दिन जाडो बिदा दिने निर्णय गरेको हो ।
महानगरका शिक्षा अधिकृत हरि राउतले सार्वजनिक सूचना जारी गरेर तीन दिन सामुदायिक र संस्थागत विद्यालयलाई जाडो बिदा दिने निर्णय भएको जानकारी दिए ।
‘बढ्दो जाडोका कारणबाट विद्यार्थीको स्वास्थ्यमा पर्न सक्ने प्रतिकूल प्रभावलाई मध्यनजर गर्दै तीन दिन वर्षे बिदाबाट कट्टा हुनेगरी विद्यालयमा पठनपाठनसम्बन्धी कार्य स्थगन गर्न गराउनुहुन सम्बन्धित सबै विद्यालयलाई जानकारीका लागि आदेशानुसार अनुरोध छ,’ सूचनामा भनिएको छ ।
यसबीचमा विद्यालयको प्रशासनिक कार्य भने सञ्चालन हुनेछ । त्यस्तै विद्यार्थीलाई गृहकार्य दिएर घरमा अध्ययन गर्ने वातावरण मिलाउन पनि महानगरले अनुरोध गरेको छ ।
त्यसैगरी पर्सागढी नगरपालिकाले पनि पुस २१ गते सार्वजनिक सूचना जारी गरेर पुस २२ देखि माघ १ सम्मका लागि सामुदायिक तथा संस्थागत विद्यालयलाई जाडो बिदा दिने निर्णय गरेको शिक्षा शाखा प्रमुख देवकुमार गिरीले जानकारी दिए ।
