मकवानपुर । मकवानपुरको इन्द्रसरोवर गाउँपालिकास्थित कुलेखानी प्रथम जलविद्युत आयोजनाको जलाशय इन्द्रसरोवर तालको ढोका बन्द गरिएको छ ।
जलाशयमा क्षमताभन्दा बढी पानी भरिएपछि बाँधको सुरक्षाका लागि शनिबार बिहान आयोजनाको दुई ढोका खोलेर पानी बाहिर निकालिएको थियो ।
बाँध खोलेर जलाशयको पानीलाई निकाशा दिएपछि जलसतह केही घटेकाले आइतबार ढोका बन्द गरिएको कुलेखानी प्रथम जलविद्युत आयोजनााका प्रमुख तारादत्त भट्टले राससलाई जानकारी दिए ।
उनका अनुसार कुलेखानीको जलाशयमा कुल एक हजार ५ सय ३० मिलिमिटर पानी भण्डारण गर्ने क्षमता भएपनि शनिबार एक हजार ५ सय ३१ मिलिमिटर पानी भरिएर खतराको संकेत देखिएपछि दुई ढोका खोलिएको थियो ।
शनिबार साँझदेखि वर्षा रोकिएको भन्दै ढोका खोलेर पानी बाहिर निकालिएकाले जलाशयमा जलसतह घटेको प्रमुख भट्टले जानकारी दिए । उनका अनुसार अहिले जल विद्युत उत्पादन पूर्ण क्षमतामा सञ्चालनमा ल्याइएको छ ।
यसैबीच वर्षा रोकिएपछि पहिरोका कारण अवरुद्ध भएको हेटौँडा-काठमाडौँ र हेटौँडा-सिन्धुली जोड्ने सडकमा आइतबार बिहानैदेखि पहिरो पन्छाउने काम सुरु भएको छ ।
सडक विभाग र सुरक्षा निकायले हेटौँडा-काठमाडौँ जोड्ने कान्ति लोकपथ र भिमफेदी-दक्षिणकाली खण्डमा बिहानैदेखि पहिरो पन्छाउने काम गरिरहेका प्रमुख जिल्ला अधिकारी तिर्थराज चिलुवालले जानकारी दिए । त्यस्तै मदनभण्डारी लोकमार्गअन्तर्गत विभिन्न स्थानमा खसेको पहिरो पन्छाएर आवागमन नियमित सञ्चालन गर्ने प्रयास भइरहेको उनले बताए ।
