मुस्ताङ । राष्ट्रिय गौरवको बेनी-जोमसोम सडक अवरुद्ध भएसँगै मुस्ताङमा पेट्रोलियम पदार्थ इन्धनको अभाव हुन थालेको छ । जसका कारण राष्ट्रिय गौरवको बेनी–जोमसोम–कोरला सडक तथा संघीय, प्रादेशिक र स्थानीय तहका विकास निर्माण योजनाका काम प्रभावित भएको छ ।
मुस्ताङमा असोज ८ देखि ११ सम्मको भारी वर्षा र त्यसबाट उत्पन्न बाढीपहिरो र नदी कटानका कारण कोरला नाकालाई जोड्ने राष्ट्रिय गौरवको (बेनी–जोमसोम) सडकमार्ग ६ दिनदेखि पूर्ण रूपमा अवरुद्ध छ । सडक अवरुद्धका मुस्ताङमा इन्धन ढुवानीमा बाधा पुगेसँगै संघीय, प्रादेशिक तथा स्थानीय तहका विकास आयोजना प्रभावित बन्न थालेका हुन् ।
म्याग्दी–मुस्ताङको सिमाना थासाङ गाउँपालिका–४ घाँसामा एक डिजेल पेट्रोल पम्प सञ्चालनमा छ । त्यहाँ इन्धन सञ्चित मात्रा सकिँदै जान थालेको छ । बाढीपहिरो र नदी कटानले अवरुद्ध बेनी–जोमसोम सडकमार्ग मर्मतका लागि घाँसास्थित पेट्रोल पम्ममा जम्मा ७०० लिटरमात्रै डिजेल प्राप्त हुन सकेको आयोजना प्रमुख तेजस्वी शर्माले जानकारी दिए ।
म्याग्दीको गलेश्वर र तातोपानीबाट दुईतर्फी रूपमा सडक मर्मत गर्ने प्रयास भइरहेको भए पनि पर्याप्त इन्धनको व्यवस्था हुन नसक्दा समस्या पर्ने गरेको उनले बताए ।
एक साताभन्दा लामो समय सडक अवरुद्ध हुँदा निर्माण व्यवसायीले सञ्चित गरेको डिजेल सकिँदै गइरहेकाले विकास निर्माणका काम अघि बढाउन समस्या परेको हो । पूर्वाधार विकास कार्यालय मुस्ताङका प्रमुख रविन चोख्यालका अनुसार लामो समय सडक अवरुद्ध निर्माण सामग्री तथा इन्धनको आपूर्ति हुन नसकेकाले विकास निर्माण कार्यमा बाधा पुगेको छ ।
निर्माण व्यवसायीले आवश्यकताअनुसार निर्माण सामग्री तथा इन्धनको जोहो गर्ने गरिएकोमा व्यवस्थापन गरिएको ईन्धन सकिँदै जान थालेकाले विकास योजना प्रभावित बन्न थालेको प्रमुख चोख्यालले बताए ।
थासाङ गाउँपालिकास्थित गुरुसाङ्वो निर्माण कन्ट्रक्सनका निर्माण व्यवसायी नविन शेरचनले एक साताअघि देखिको सडक अवरुद्ध तथा भारी वर्षाका कारण इन्धनको ढुवानी हुन नपाएकाले मुस्ताङमा विकास निर्माणका काम अलपत्र परेको बताए ।
मुस्ताङमा बेनी–जोमसोम सडक अवरुद्ध भएसँगै पेट्रोलको समेत अभाव हुन थालेको छ । मुस्ताङमा पोखराबाट ब्यारेलमा ढुवानी गरी मिनरल वाटरको बोतलमा बिक्री गर्ने प्रचलन रहेको भए पनि ब्यारेलमा पेट्रोल ढुवानी गरी बिक्री गर्ने पसलमा पेट्रोल पाइप छोडेको छ ।
सडक अवरुद्ध हुँदा इन्धन ढुवानीमा रोकिएपछि मुस्ताङमा पेट्रोलियम पदार्थको कालोबजारीसमेत सुरु हुन थालेको छ । सामान्य अवस्थामा २२५ रुपैयाँ प्रतिलिटर पर्ने पेट्रोल व्यापारीले इन्धन अभावको मौका छोपी बढी मूल्यमा बिक्री गर्न थालेको पाइएको छ । इन्धनको अभावसँगै मुस्ताङमा दैनिक उपभोग्य वस्तुहरूको मूल्यसमेत वृद्धि हुँदा सर्वसाधारण नागरिक समस्यामा पर्दै आएका छन् ।
