एजेन्सी । बेलायतका प्रधानमन्त्री एन्डी बर्नहम र फ्रान्सका राष्ट्रपति इमानुएल म्याक्रोनबीच बिहीबार हुने वार्तामा इङ्ग्लिस च्यानल हुँदै हुने अवैध आप्रवासन नियन्त्रण, युक्रेनलाई निरन्तर सहयोग तथा युरोपको सुरक्षा प्रमुख विषय बन्ने भएका छन् ।
वार्ताअघि दुवै नेताले बुधबार ब्रिटिस म्युजियममा राजा चार्ल्स तृतीयसँग भेट गरेका थिए । सो अवसरमा फ्रान्सबाट लन्डन ल्याइएको ११औँ शताब्दीको बायक्स टेपेस्ट्रीको प्रदर्शनीको पूर्वावलोकन गरिएको थियो । बेलायतको नर्मन विजय चित्रण गर्ने उक्त ऐतिहासिक कलाकृति दुई देशबीचको साझा इतिहास र बढ्दो सम्बन्धको प्रतीकका रूपमा प्रस्तुत गरिएको छ ।
आप्रवासन नियन्त्रणतर्फ बेलायत र फ्रान्सले च्यानल पार गर्न प्रयोग हुने साना डुंगा रोक्न संयुक्त प्रयासलाई थप प्रभावकारी बनाउने भएका छन् । डाउनिङ स्ट्रिटका अनुसार पछिल्लो समय आप्रवासी ओसार्न प्रयोग हुने ठूला तथा शक्तिशाली डुंगा रोक्न विशेष ध्यान दिइनेछ । आगामी सातामा ४५ फ्रान्सेली अधिकारीको विशेष टोली समुद्री तटमा परिचालन गरिनेछ ।
बेलायत सरकारले यस गर्मीमा सन् २०१९ यताकै कम संख्यामा आप्रवासीले साना डुंगामार्फत च्यानल पार गरेको जनाएको छ । तर प्रधानमन्त्री बर्नहमले तस्करी गिरोहले आफ्नो रणनीति निरन्तर परिवर्तन गरिरहेकाले आत्मसन्तुष्ट हुने अवस्था नरहेको बताएका छन् ।
वार्तामा युक्रेनलाई सहयोग जारी राख्ने विषय पनि महत्त्वपूर्ण हुनेछ । प्रधानमन्त्री बर्नहमले सरकार परिवर्तन भए पनि युक्रेनप्रतिको बेलायतको नीति नबदलिएको बताएका छन् । राष्ट्रपति म्याक्रोनले पनि युक्रेनको समर्थनमा बेलायत र फ्रान्सबीचको संयुक्त प्रयास महत्त्वपूर्ण रहेको उल्लेख गरेका छन् । उनले युक्रेनलाई उपलब्ध गराइने एससिएएलपी लामो दूरीका क्षेप्यास्त्रका लागि आवश्यक केही सामग्रीबारे बेलायतले जानकारी सार्वजनिक गरेको बताएका छन् ।
मध्यपूर्वको स्थायित्व र हर्मुज जलघाँटी पुनः सञ्चालनमा ल्याउने विषयमा समेत छलफल हुनसक्ने डाउनिङ स्ट्रिटले जनाएको छ ।
राष्ट्रपति म्याक्रोनले अमेरिकी निर्भरता घटाउँदै युरोपेली सार्वभौमिकता बलियो बनाउने पक्षमा बेलायतलाई महत्त्वपूर्ण साझेदारका रूपमा हेरेका छन् । प्रधानमन्त्री बर्नहम पनि पूर्वप्रधानमन्त्री कीर स्टारमरले अघि बढाएको युरोपेली संघ (इयु) सँगको निकट सहकार्यलाई निरन्तरता दिन इच्छुक देखिएका छन् ।
म्याक्रोनले बेलायत र फ्रान्सबीच सबै विषयमा समान धारणा नरहे पनि पारस्परिक सम्मान कायम रहेको बताएका छन् । तर किङ्स कलेज लन्डनका राजनीति प्राध्यापक आनन्द मेननले दुई देशबीचको निकटता व्यावहारिक उपलब्धिमा परिणत हुनुपर्ने बताउँदै युरोपेली संघसँगको सम्बन्धमा ठोस प्रगति आवश्यक रहेको टिप्पणी गरे ।
