पर्सा । पर्सा प्रहरीले चालु आर्थिक वर्षको साउनदेखि चैत २२ सम्ममा ३६ करोड ८४ लाख ८३ हजार २६० रुपैयाँ मूल्य पर्ने अवैध सामान बरामद गरेको छ ।
प्रहरीको सक्रियताले दिनहुँजसो भन्सार छली गरेका तथा बिलबिजकमा भन्दा धेरै सामान ल्याएको सामग्री नियन्त्रणमा लिने क्रम बढेको हो ।
जिल्ला प्रहरी कार्यालय पर्साका प्रहरी नायब उपरीक्षक कुमारविक्रम थापाले भन्सार छली तथा चोरी पैठारी र बिलबिजकभन्दा धेरै सामान ल्याउनेविरुद्ध प्रहरीले कारबाही गरिरहेको बताए ।
‘नेपाल प्रहरीले एक सातामा भन्सार छली गरेर ल्याएका करिब एक करोड मूल्य पर्ने सामान तथा वस्तु नियन्त्रणमा लिँदै आइरहेको छ,’ उनले भने, ‘चोरी तस्करी गरेर भित्र्याएको सामानलाई पक्राउ गरेर वीरगन्ज भन्सार कार्यालयलाई बुझाउने गर्छौं, बिलबिजक अनुसारको नभए राजस्व अनुसन्धान कार्यालय पथलैयामा बुझाउने गरेका छौँ ।’
पर्साका प्रमुख जिल्ला अधिकारी दिनेशसागर भुसालले खुला सीमाका कारण चोरी तस्करी सक्रिय भएको बताए । ‘पर्साको सिमाना भारतसँग १७० किलोमिटर जोडिएको छ,’ उनले भने, ‘चोरी तस्करी नियन्त्रण गर्न सबै निकायलाई निर्देशन दिँदै आइरहेको छु ।’
चालु आवको चैत २२ सम्मको अवधिमा राजस्व अनुसन्धान कार्यालय पथलैयामा ३१ करोड ८९ लाख ७३ हजार मूल्य पर्ने सामान बुझाएको छ । त्यस्तै भन्सार कार्यालय वीरगन्जलाई चार करोड ९५ लाख ९ हजार २७३ मूल्य पर्ने सामान बरामद गरी बुझाएको छ ।
प्रहरीले गत आव २०७९/८० मा ४८ करोड ९ लाख ६४ हजार ६४६ मूल्य पर्ने वस्तु तथा सामान बरामद गरेको थियो । जसमा किरानाको सामान आठ करोड तीन लाख पाँच हजार ९७५ रुपैयाँबराबरको थियो । त्यसैगरी विद्युतीय सामग्री एक करोड ८० लाख मूल्यबराबरको थियो ।
त्यसैगरी गत आवमै सवारीसाधनको पार्टपुर्जासम्बन्धी १५ करोड ५८ लाख ७७ हजारको बरामद गरेको जिल्ला प्रहरीको तथ्यांकमा उल्लेख छ । लत्ताकपडा २२ करोड ३५ लाख ६६ हजार मूल्यबराबरको बरामद गरेको र गत आवमा चोरी तस्करीमा संलग्न १५ अभियुक्तलाई पक्राउ गरेको प्रहरीले जनाएको छ । प्रहरीले गत आवमा ९५ वटा सवारीसाधन नियन्त्रणमा लिएको थियो ।
