काठमाडौं । नेपाल वायुसेवा निगमले अस्ट्रेलिया सीधा उडानको प्रक्रिया अघि बढाएको छ ।
अस्ट्रेलियाको सिड्नी विमानस्थलमा उडानको समय (स्लट) पाइसकेको निगमले अस्ट्रेलियन नागरिक उड्डयनसँग अनुमति माग गरेको जनाएको छ ।
किङ्सफर्ड स्मिथ अन्तर्राष्ट्रिय विमानस्थलले बिहीबार र शनिबारका लागि निगमलाई स्लट दिएको हो ।
अनुमतिका लागि अरु सबै प्रक्रिया पूरा गरिसकेको निगमले अस्ट्रेलियन नागरिक उड्डयनलाई अनुमतिका लागि पत्राचार गरिसकेको जनाएको छ ।
निगमका अनुसार उडान अनुमतिका लागि नेपाल सरकार, पर्यटन मन्त्रालय र नेपाल एयरलाइन्सले प्रक्रिया पूरा गरेको र दूतावासले सहजीकरण गरिरहेको छ ।
सन् २०१९ मा नेपाल र अस्ट्रेलियाबीच हवाई सम्झौता भएको थियो । अस्ट्रेलियामा करिब दुई लाख नेपाली रहेकाले निगमले सीधा उडानको तयारी गरेको हो ।
