काठमाडौं । भैरहवास्थित गौतमबुद्ध अन्तर्राष्ट्रिय विमानस्थलबाट चार अन्तर्राष्ट्रिय एयरलाइन्सले नियमित उडान गरिरहेका छन् । यसअघि मौसमी अवस्था र यात्रु अभावले नियमित उडान हुन सकिरहेको थिएन ।
अहिले उक्त विमानस्थलबाट राष्ट्रिय ध्वजावाहक नेपाल वायुसेवा निगम (नेपाल एयरलाइन्स), कुवेतको जजिरा एयरवेज, दुबईको राष्ट्रिय ध्वजावाहक फ्लाई दुबई र थाइल्यान्ड मुख्यालय रहेको थाई एयर एसियाले अन्तर्राष्ट्रिय उडान गरिरहेका हुन् ।
भैरहवामा चार अन्तर्राष्ट्रिय एयरलाइन्सको नियमित उडान भइरहेको गौतमबुद्ध विमानस्थलका महाप्रबन्धक प्रतापबाबु तिवारीले जानकारी दिए । नियमित अन्तर्राष्ट्रिय उडान सञ्चालन भएसँगै विमानस्थल चलायमान बन्ने र अन्य एयरलाइन्स पनि आकर्षित हुने विश्वास उनले व्यक्त गरे ।
गौतमबुद्ध विमानस्थलमा नेपाल एयरलाइन्सले क्वालालम्पुर-भैरहवा-काठमाडौँ भएर उडान भर्दै आएको छ । जजिरा एयरवेज र थाई एयर एसियाले माघ २४ देखि पुनः उडान सुरु गरेको विमानस्थल कार्यालयले जनाएको छ । फ्लाई दुबईले एक महिना अघिदेखि पुनः उडान सुरु गरेको थियो । जजिरा एयरवेज र थाई एयर एसियाले कात्तिकदेखि उडान सुरु गरेका हुन् ।
गौतमबुद्ध विमानस्थलबाट फेब्रुअरीमा ११५ उडानमार्फत ६ हजार ८७९ यात्रुको आवागमन भएको विमानस्थल कार्यालयले जनाएको छ ।
