काठमाडौं । काठमाडौं महानगरपालिकाकी उपप्रमुख सुनिता डंगोलले प्रमुख बालेन साहलाई कोठामा बसेर आदेश नदिन चेतावनी दिएकी छन् । प्रमुख प्रशासकीय अधिकृत सरोज गुरागाईंलाई हाजिर हुन रोक्न नगर प्रहरी परिचालन गरेपछि उनले यस्तो प्रतिक्रिया दिएकी हुन् ।
डंगोलले महानगर प्रमुख बालेन साहको आलोचना गर्दै भनिन्, ‘मन्त्रालयबाट पठाइएका प्रमुख प्रशासकीय अधिकृत कार्यालय हाजिर हुन आएका छन् । यस्तो अवस्थामा झडप हुनु राम्रो होइन । कर्मचारीहरूबीच विवाद हुनु पनि उचित होइन।’
उनले नगरवासीको हितका लागि सबै पक्ष एकजुट हुनुपर्ने बताइन्। ‘यो तमासा हामीले हेर्नुपर्ने ? यदि यो मेयरको आदेश हो भने उहाँ आफैं अघि आउनुपर्छ, होइन भने कोठामा बसेर आदेश दिन पाइँदैन। आजको समस्या समाधान गरेरमात्रै बोर्ड बैठक बस्छौं ।’
नगर प्रहरीको अवरोधबीच अहिले महानगरपालिकामा अनौपचारिक बैठक बसेको छ, जसमा उपप्रमुख डंगोलले मेयर साहको कडा आलोचना गरेकी छन् ।
डंगोलले संस्थाभित्र द्वन्द्व बढ्न नहुने उल्लेख गर्दै प्रमुख प्रशासकीय अधिकृत दोषी ठहर भए कानुनी प्रक्रिया अनुसार कारबाही गर्नुपर्ने बताइन् ।
‘हजारौं कर्मचारी र लाखौं काठमाडौंवासी समस्यामा परेका छन् । क्यान्सर पीडितहरूलाई समेत आर्थिक सहायता दिन सकेका छैनौं । यदि अझै छानबिन गर्नुपर्ने हो भने त्यसको उचित प्रक्रिया अपनाउनुपर्छ, तर यसरी पीडामा राख्नु हुँदैन ।’
अवरोध छिचोल्दै कार्यालय प्रवेश
साढे तीन महिनापछि प्रमुख प्रशासकीय अधिकृत सरोज गुरागाईं हाजिर हुन कार्यालय पुगेका छन् । संघीय मामिला तथा सामान्य प्रशासन मन्त्रालयले उनलाई कार्यालय फर्कन पत्र पठाएको एक महिना पुगिसकेको छ ।
मेयर साहले गुरागाईंलाई रोक्न नगर प्रहरी तैनाथ गरे पनि उनले अवरोध पार गर्दै कार्यालय प्रवेश गरेका छन् । प्रवेश गरेपछि कार्यालयको ताला समेत फोड्न लगाइएको थियो ।
मेयर साहको चर्को आलोचना
काठमाडौं महानगरका प्रवक्ता नविन मानन्धरसहित अधिकांश वडाध्यक्षहरूले पनि मेयर बालेन साहको आलोचना गरेका छन् । उपप्रमुख डंगोलले नगर प्रहरी प्रमुख राजु पाण्डेलाई ताला लगाउने निर्णयबारे प्रश्न गर्दा उनले टालटुल उत्तर दिएका थिए ।
