आइएमई पे प्रतिष्ठित ‘डिजिटल सर्भिसेज आईसीटी पुरस्कार २०२४’ बाट सम्मानित

काठमाडौं । नेपालको पहिलो डिजिटल वालेट आइएमई पे आईसीटी अवार्ड २०२४ को डिजिटल सर्भिसेज विधाबाट सम्मानित भएको छ । पुस ५ गते शुक्रबार काठमाडौंमा सम्पन्न भएको आईसीटी अवार्ड कार्यक्रममा आइएमई पे डिजिटल सर्भिसेजलाई सम्मानित गरिएको हो ।

आईसीटी अवार्डले नेपालको टेक्नोलोजी क्षेत्रमा उत्कृष्टता र नवीनता ल्याउन पहल गर्ने कम्पनीहरूलाई सम्मानित गर्छ । आफ्नो नवीन र प्रयोगकर्ता मैत्री प्लेटफर्ममार्फत आइएमई पेले डिजिटल भुक्तानीलगायतका विभिन्न वित्तीय सेवाहरु प्रयोग गर्ने तरिकामा उत्साहजनक परिवर्तन ल्याएको छ । यो प्रतिष्ठित अवार्डले नेपालको डिजिटल वित्तीय परिदृश्यमा आईएमई पेको महत्वपूर्ण योगदानलाई सम्मान गरेको छ ।

‘डिजिटल सर्भिसेज आइसिटि अवार्ड २०२४ बाट सम्मानित हुन पाउँदा हामी निकै गौरवान्वित भएको छौँ । यो पुरस्कार आइएमई पेमा कार्यरत सम्पूर्ण कर्मचारीको परिश्रम, समर्पण र हाम्रा साझेदारहरूको विश्वास र सहयोगको परिणाम हो,’ आईएमई पेका प्रमुख कार्यकारी अधिकृत प्रवीण रेग्मीले भने ।

यो अवार्डले नेपालमा डिजिटल वित्तीय सेवा क्षेत्रमा अग्रणीको रूपमा आइएमई पेको स्थानलाई अझ बलियो बनाउँछ । आइएमई पे वित्तीय समावेशीकरण र प्रविधिको प्रयोगले देशभरका व्यक्ति र व्यवसायलाई सशक्त बनाउन प्रतिबद्ध छ ।