बाँके । बाँकेको राप्ती सोनारी गाउँपालिका-१ भम्कास्थित राप्ती नदीको क्षतिग्रस्त झोलुंगे पुल मर्मत नहुँदा दुर्घटनाको जोखिम बढेको छ ।
एक महिनाअघि आएको हावाहुरीले बैरिया-भम्का जोड्ने राप्ती नदीको झोलुंगे पुलको पश्चिमतर्फको लठ्ठा चुँडिएपछि पुल क्षतिग्रस्त भई जोखिमपूर्ण अवस्थामा पुगेको राप्ती सोनारी-१ का वडाध्यक्ष यमबहादुर खड्काले बताए ।
‘भम्का गाउँका करिब ३०० जनता लठ्ठा चुँडिएको झोलुंगे पुलबाट जोखिम मोलेर आवतजावत गर्न बाध्य छन्,’ वडाध्यक्ष खड्काले भने, ‘पुल मर्मतका लागि गाउँपालिका, प्रदेश सरकार र संघीय सरकारसम्म अनुरोध गरियो तर हालसम्म बन्ने सुरसार देखिएको छैन ।’
तीन सय मिटरभन्दा लामो पुल निर्माण तथा मर्मत कार्य संघीय सरकारबाट हुने भएकाले सम्बन्धित निकायमा झोलुंगे पुलको आवश्यक जानकारी तथा स्थलगत प्रतिवेदन बुझाउने काम भए पनि मर्मतसम्भारको काम हुन नसकेको वडाध्यक्ष खड्काको भनाइ छ ।
झोलुंगे पुल मर्मत नहुँदा भम्का गाउँबाट वडाको केन्द्र कुसुम बैरिया बजार किनमेलका लागि आउने सर्वसाधारण र विद्यार्थीलाई समस्या भएको स्थानीय अगुवा नरेन्द्र कार्कीले बताए ।
भम्का पुल मर्मतसम्भारका लागि विभागले सम्बन्धित ठाउँमा गएर अनुगमन गरी प्रतिवेदन पेस गरिसकेको बाँके क्षेत्र नं १ का संघीय सांसद सूर्य ढकालले बताए । प्रतिवेदन अर्थ मन्त्रालयमा पुगिसकेकाले अब छिट्टै बजेट निकासा हुने उनको भनाइ छ ।
