एजेन्सी । कोभिड-१९ महामारी सुरु भएयता अमेरिकी उपभोक्ताको विश्वास सबैभन्दा न्यून स्तरमा झरेको छ । अमेरिकी राष्ट्रपति डोनाल्ड ट्रम्पको कर योजनाका बारेमा चिन्ता व्यक्त गरिएका बेला मंगलबार प्रकाशित सर्वेक्षण तथ्यांकअनुसार अमेरिकी उपभोक्ताको विश्वास सबैभन्दा न्यून स्तरमा झरेको पाइएको हो ।
‘अमेरिकी उपभोक्ता विश्वास सूचकांक अप्रिलमा ७.९ अंकले घटेर ८६.० मा झरेको छ,’ कन्फरेन्स बोर्डले उपभोक्ता विश्वास सूचकांकलाई उद्धृत गर्दै जानकारी गराएको छ । प्रतिक्रियाहरूमा उपभोक्ता विश्वास सूचकांकमा आएको गिरावट ‘सर्वकालिक उच्च’ स्तरमा पुगेको छ ।
यो सन् २०२० को मे यताकै सबैभन्दा कम भएको एक प्रवक्ताले एएफपीलाई पुष्टि गरेका छन् । कन्फरेन्स बोर्डका वरिष्ठ अर्थशास्त्री स्टेफनी गुइचार्डले भने, ‘अप्रिलसँगै लगातार पाँचौं महिना उपभोक्ताको विश्वास घटेको पाइएको छ ।’
‘व्यापारको अवस्था, रोजगारीको सम्भावना र भविष्यको आयजस्ता तीन अपेक्षाका अवयवहरू तीव्र रूपमा बिग्रिएका छन्, जसले भविष्यको बारेमा व्यापक निराशावादलाई प्रतिबिम्बित गर्छ,’ उनले भने । अमेरिकी राष्ट्रपति ट्रम्पको कर योजनाले लगानीकर्ता निराश बनाएको छ, जसले बजारको अस्थिरतालाई बढावा दिएको छ र उपभोक्ताको विश्वासमा गिरावट आएको छ।
गुइचार्डका अनुसार ४८.५ प्रतिशत उपभोक्ताले आगामी १२ महिना सेयरको मूल्य घट्ने अनुमान गरेका छन्, जुन अक्टोबर २०११ पछिको सबैभन्दा उच्च हिस्सा हो । ‘औसत १२ महिनाको मुद्रास्फीतिको अपेक्षा यस महिनामा ७ प्रतिशत पुगेको छ, जुन सन् २०२२ नोभेम्बरपछिको उच्चतम हो र यो अर्को चिन्ताजनक संकेत हो,’ उनले भने ।
मुद्रास्फीतिको सम्भावना कायम रहिरहेमा व्यवसायहरूले भविष्यमा उनीहरूको लागत अझ बढ्नेछ भन्ने प्रत्याशामा मूल्यहरू बढाउँछन् र यसले मूल्यवृद्धिको दुष्चक्र निम्त्याउन सक्छ ।
