बाजुरा । चार नगरपालिका र पाँच गाउँपालिकाका नगर उपप्रमुख र गाउँपालिकाका उपाध्यक्षले आर्थिक वर्ष २०८३/८४ का लागि बुधबार बजेट प्रस्तुत गरेका छन् ।
उक्त निकायले सदरमुकाम मार्तडीमा शिक्षा, कृषि, स्वास्थ्य र पूर्वाधारमा जोड दिँदै बजेट नगर तथा गाउँसभामा सार्वजनिक गरेका हुन् ।
बडीमालिका नगरपालिकाका उपप्रमुख नन्दाकुमारी थापाले आव २०८३/८४ का लागि ५१ करोड ६९ लाख १९ हजारको बजेट सभामा प्रस्तुत गरेकी छन् ।
बुढीगंगा नगरपालिकाकी उपप्रमुख माया खड्का (कुँवर) ले आव २०८३/८४ का लागि ५६ करोड ५७ लाख १४ हजार बजेट सभामा पेस गरिन् । त्रिवेणी नगरपालिकाले ५४ करोड ९५ लाख ७२ हजारको बजेट सभामा प्रस्तुत गरिन् ।
सभामा नगर उपप्रमुख कमलाकुमारी जैशी (न्यौपाने) ले चालुतर्फ ३५ करोड १८ लाख ४४ हजार र पुँजीगततर्फ १९ करोड ७७ लाख २८ हजार बजेट जाहेर गरेकी हुन् ।
बुढीनन्दा नगरपालिकाले पनि ५७ करोड ६ लाख ९६ हजार बजेट सभामा प्रस्तुत गरेका छन् । नगर उपप्रमुख रामबहादुर बोहराले चालुतर्फ ३७ करोड ९४ लाख ४८ हजार र पुँजीगततर्फ १९ करोड, आठ लाख ४८ हजार विनियोजन गरेका हुन् ।
हिमाली गाउँपालिकाका उपाध्यक्ष राजकला सार्कीले आव २०८३/८४ का लागि ४३ करोड ६८ लाख ३९ हजार बजेट पेस गरे । उनले पुँजीगततर्फ १८ करोड एक हजार र चालुतर्फ २५ करोड ६८ लाख २१ हजार प्रस्तुत गरेका हुन् ।
स्वामीकार्तिक खापर गाउँपालिकाका उपाध्यक्ष सुलोचनाकुमारी भण्डारी (बुढा) ले ४४ करोड १६ लाख दुई हजार बजेट गाउँसभामा प्रस्तुत गरेका छन् । जगन्नाथ गाउँपालिकाले ३८ करोड ६३ लाखको बजेट प्रस्तुत गरेको छ ।
गाउँपालिकाले चालुतर्फ २३ करोड ६८ लाख १० हजार ५०० र पुँजीगततर्फ १४ करोड ९४ लाख ९० हजार ५०० विनियोजन गरेको छ । खप्तड छेडेदह गाउँपालिका उपाध्यक्ष विसुदेवीनाथले आव २०८३/८४ का लागि सभामा ५३ करोड १५ लाख ६९ हजारको बजेट पेस गरेका छन् ।
गौमूल गाउँपालिकाका उपाध्यक्ष सीता थापाले आव २०८३/८४ का लागि ४० करोड ३१ लाख २९ हजार बजेट गाउँसभामा प्रस्तुत गरिन् । थापाले गाउँसभामा चालुतर्फ २८ करोड ६० लाख २७ हजार र पुँजीगततर्फ ११ करोड ७१ लाख दुई हजारको बजेट पेस गरेकी हुन् ।
सभामा प्रस्तुत गरिएका सबै स्थानीय तहका बजेटले शिक्षा, स्वास्थ्य, कृषि, पूर्वाधार विकास, पर्यटन लगायतमा जोड दिइएको छ ।
