कास्की । दोस्रो मुख्य पर्यटकीय याममा अन्नपूर्ण संरक्षण क्षेत्रमा पर्यटकको आवतजावत ह्वात्तै बढेको छ । गएको अप्रिलमा मात्र ४४ हजार ७६३ विदेशी पर्यटकले उक्त क्षेत्रको भ्रमण गरेको अन्नपूर्ण संरक्षण क्षेत्र आयोजना (एक्याप) ले जनाएको छ ।
गत वर्ष अप्रिलको तुलनामा अन्नपूर्ण संरक्षण क्षेत्र पर्यटकको संख्या १० हजार ८५२ ले बढी हो । सन् २०२४ को अप्रिलमा ३३ हजार ९११ पर्यटक उक्त क्षेत्रमा पुगेका थिए । ‘एक्याप’ को आँकडाअनुसार पछिल्ला वर्षमा पर्यटक आगमन दर वृद्धि भइरहेको छ ।
कोभिड–१९ महामारीका बेला थलिएको यस क्षेत्रको पर्यटन पुरानै लयमा फर्किएको ‘एक्याप’ का प्रमुख डा. रविन कडरियाले बताए । मार्चदेखि मे महिनासम्म धार्मिक भ्रमणदेखि पदयात्राका लागि उल्लेख्य मात्रामा पर्यटक यस क्षेत्रमा आउने गरेको उनले जानकारी दिए । मार्चमा पनि ३६ हजार ८३४ पर्यटकले अन्नपूर्ण क्षेत्रको भ्रमण गरेका थिए ।
त्यसअघि फेब्रुअरीमा १२ हजार ६८ र जनवरीमा ९ हजार ३५९ पर्यटक उक्त क्षेत्रमा आएका थिए । सन् २०२५ यता अघिल्ला वर्षहरूको तुलनामा पर्यटक आगमन दर बढेको प्रमुख डा. कडरियाले बताए । सन् २०२४ को पहिलो चार महिनामा ७८ हजार ९६८ पर्यटक भित्रिएकोमा यो वर्षको पहिलो चार महिनामा १ लाख ३ हजार २४ पर्यटक आएका हुन् ।
सन् २०२३ को सोही अवधिमा जम्मा ६८ हजार ७५६ पर्यटकले अन्नपूर्ण क्षेत्रको भ्रमण गरेका थिए । अन्नपूर्ण क्षेत्र पदयात्रा पर्यटनका लागि विश्वप्रसिद्ध गन्तव्य हो । वर्षात् र जाडो याममा यस क्षेत्रमा आउने पदयात्री पर्यटकको संख्या न्यून हुने गरे पनि अन्य सययमा भने आन्तरिक तथा बाह्य पर्यटकको चहलपहल हुने गरेको छ ।
सडक मार्गबाट घुम्न र पदयात्रा गर्न आउने विदेशी पर्यटकको संख्या बढेको आयोजना कार्यालयले जनाएको छ । मुक्तिनाथलगायतका गन्तव्यमा जाने अधिकांश भारतीय पर्यटकले सडक मार्ग प्रयोग गरे पनि अन्य मुलुकका पर्यटकले भने पदयात्रा रुचाउने गरेका छन् । ‘एक्याप’ले अन्नपूर्ण चक्रीय पदमार्गमा घुमफिर गर्ने विदेशी पर्यटकको मात्र तथ्यांक राख्ने गरेको छ ।
अन्नपूर्ण चक्रीय पदमार्गमा अन्नपूर्ण आधार शिविर, कास्कीको मर्दी हिमाल, सिक्लेस, ल्वाङ, घान्द्रुक गाउँ, मनाङको तिलिचो ताल, थोरङ्ला भञ्ज्याङ, उपल्लो मुस्ताङ, मुक्तिनाथ क्षेत्र, म्याग्दीको घोडेपानी, पुनहिललगायत गन्तव्यस्थलमा बर्सेनि लाखौँ आन्तरिक तथा बाह्य पर्यटक पुग्ने गरेका छन् ।
सात हजार ६ सय वर्ग किलोमिटरमा फैलिएको अन्नपूर्ण संरक्षण क्षेत्रमा कास्की, लमजुङ, मनाङ, म्याग्दी र मुस्ताङका १५ स्थानीय तहका ८७ वडा पर्छन् । अन्नपूर्ण क्षेत्र प्राकृतिक सौन्दर्य, जैविक विविधता, हिमाली जनजीवन, सम्भयता, संस्कृति आदि कारणले आन्तरिक तथा बाह्यक पर्यटकको रोजाइमा पर्ने गरेको छ ।
हिमशृंखलासहितका आकर्षक गन्तव्यस्थल, पर्यटनमैत्री पूर्वाधार, हावापानी, स्थानीयवासीको आतिथ्यता र सेवा सुविधाका हिसाबले अन्नपूर्ण चक्रीय पदमार्ग घुमफिरका लागि विश्वकै उत्कृष्ट गन्तव्यका रूपमा चिनिएको छ । कास्की, लमजुङ, मनाङ, म्याग्दीलगायतका मार्गबाट अन्नपूर्ण क्षेत्रको छोटो, मध्यम र लामो दूरीको पदयात्रा गर्न सकिन्छ ।
