काठमाडौं । नेपाल विद्युत् प्राधिकरणका पूर्वकार्यकारी निर्देशक कुलमान घिसिङले जनताको घरघरमा बिजुली पुर्याउन सक्नु नै आफ्नो कार्यकालको सफलता भएको भएका छन् । प्राधिकरणको कार्यकारी निर्देशकबाट बर्खास्तीमा परेका घिसिङले शुक्रबार पत्रकार सम्मेलन गरी लोडसेडिङ अन्त्य कुनै चमत्कार नभएर इमानदार प्रयास भएको बताए ।
‘वैदेशिक मुद्रामा चाप परेका बेला विद्युत् निर्यात गरेर अर्थतन्त्रमा योगदान पुर्यायौँ, निरन्तर घाटामा रहेको प्राधिकरण अहिले अर्बौं नाफामा छ,’ उनले भने, ‘हामी प्राधिकरणलाई सशक्त र आत्मनिर्भर बनाउन सफल भयौं, यो नै मेरो कार्यकालको सफलता हो ।’
सरकारले कार्यकाल बाँकी छँदै प्रतिशोधपूर्ण तरिकाले बर्खास्त गरेपछि घिसिङ सर्वोच्च अदालत गएका थिए । बिहीबार सर्वोच्चले अन्तरिम आदेश नदिएपछि आज उनले पत्रकार सम्मेलन गरेका हुन् ।
