काठमाडौं । नेपाल राष्ट्र बैंकका गभर्नर महाप्रसाद अधिकारीले केन्द्रीय बैंकमाथि सरकारबाट ठाडो हस्तक्षेप भएको बताएका छन् । राष्ट्र बैंकमा शुक्रबार एक कार्यक्रम आयोजना गरी पाँच वर्षे कार्यकालको उपलब्धि सार्वजनिक गर्ने क्रममा उनले सरकारबाट हस्तक्षेप भएको बताएका हुन् ।
घुमाउरो भाषामा उनले आफ्नो कार्यकालको दोस्रो वर्ष पुग्दै गर्दा केन्द्रीय बैंकमाथि तत्कालीन सरकारबाट प्रहार भएको बताए । ‘कार्यकालको दोस्रो वर्ष पुग्दै गर्दा नेपाल राष्ट्र बैंक नेतृत्वमाथि प्रहार भई केन्द्रीय बैंकको स्वायत्ततामाथि ठाडो हस्तक्षेप भएको अवस्थामा बैंक सञ्चालनको विश्वव्यापी मान्यताअनुरुप स्वायत्ततालाई अक्षुण राखिदिनुहुने सर्वोच्च अदालत, न्यायाधीश तथा अधिवक्ताप्रति हार्दिक कृतज्ञता व्यक्त गर्दछु,’ उनले भने ।
तत्कालीन शेरबहादुर देउवा नेतृत्वको सरकारले २०७८ चैत अन्तिम साता अर्थमन्त्री जनार्दन शर्माको दबाबमा गभर्नर अधिकारीलाई निलम्वन गरेको थियो । निलम्बनपछि सर्वोच्च अदालत पुगेका अधिकारीलाई अदालतले पुनर्बहाली गरेको थियो । त्यसैलाई उनले कार्यकाल सकिँदै गर्दा शक्रबार सरकारको हस्तक्षेपका रुपमा उल्लेख गरेका छन् ।
कार्यकाल सम्हाल्दै गर्दा कोरोना महामारी र त्यसलगत्तैको रुस-युक्रेन युद्धका कारण मुलुकको अर्थतन्त्रमा ठूला चुनौती आइपरेको गभर्नर अधिकारीले बताए । ‘तर ती चुनौतीलाई केन्द्रीय बैंकले गर्न सक्ने रुपमा समाधानको पहल गरेको छ,’ उनले भने ।
कोभिड संक्रमणको पहिलो वर्षबाहेक बाँकी चार वर्ष ऐनले निर्दिष्ट गरेको व्यवस्थाअनुसार समयमै सरकारसमक्ष वार्षिक प्रतिवेदन पेस गर्न सफल भएको उनले बताए । सूचना प्रविधि महाशाखालाई विभागमा अपग्रेड गरिएको, रेमिट्यान्स कम्पनी तथा गैरबैंकिङ संस्थालाई सुपरिवेक्षण गर्न नयाँ विभाको स्थापना गरिएको विषयलाई उनले कार्यकालका उपलब्धिका रुपमा उल्लेख गरेका छन् ।
अधिकारीले आफ्नो कार्यकालमा संस्थागत सुधार र विश्वसनीयता निर्माणमा मुख्य ध्यान केन्द्रित गरेको बताए । ‘अब नयाँ गभर्नरको नेतृत्वमा राष्ट्र बैंक अझ बढी सशक्त र स्वतन्त्र हुने आशा व्यक्त गर्दछु,’ उनले भने । नेपाल राष्ट्र बैंकका १७औँ गभर्नर अधिकारीको पाँच वर्षे कार्यकाल चैत २४ गते सकिँदैछ ।
