नयाँ सीईओलाई नेप्सेको रातो झन्डा, लगातार तीन दिन बढेको बजारमा १७ अंकको गिरावट

काठमाडौं । नयाँ प्रमुख कार्यकारी अधिकृत (सीईओ)लाई नेपाल स्टक एक्स्चेन्ज (नेप्से)ले रातो झन्डा देखाएर स्वागत गरेको छ । मन्त्रिपरिषदको सोमबार बसेको बैठकबाट नियुक्त सीईओ चुडामणि चापागाईंलाई नेप्सेले रातो झन्डा देखाएको हो ।

तीन दिन लगातार बढेको बजार आज मंगलबार घटेको छ । तीन दिनमा २५८२.७३ अंकबाट ११०.३९ अंकले बढेर २६९३.१२ अंकमा उक्लिएको बजार आज सीईओ पाएको दिन १६.९५ अंकले घटेर २६७६.१७ अंकमा उर्लिएको हो ।

आज व्यापारबाहेकका सबै समूह राताम्य हुँदा २०१ कम्पनीको सेयर मूल्य ओरालो लागेको छ । व्यापार समूह सबैभन्दा धेरै ४.२९ प्रतिशतले बढ्दा वित्त समूह सबैभन्दा धेरै १.८२ प्रतिशतले घटेको छ । घटेको बजारमा ५ अर्ब ७९ करोड ७७ लाख रुपैयाँबराबरको सेयर कारोबार भएको छ ।

झापाको दमक घर भएका चापागाईंले आजै नियुक्ति पाएका छन् । उनीसँग सानिमा र सनराइज बैंक एवं सानिमा रिलायन्स लाइफ इन्स्योरेन्समा काम गरेको अनुभव छ । क्षमता र अनुभवभन्दा पनि प्रधानमन्त्री केपी ओलीसँग निकट भएकै कारण बलिया प्रतिस्पर्धीलाई पाखा लगाएर नेप्सेको सीईओ फुत्काउन चापागाईं सफल भएका हुन् । उनीमाथि सानिमा रिलायन्सबाट करोडौंको फेक पोलिसी जारी गराएको आरोप छ ।