काठमाडौं । सामाजिक सुरक्षा कोषमा २३ सयभन्दा बढी विद्यालय आबद्ध भएको पाइएको छ । निजी तथा आवासीय विद्यालय अर्गनाइजेसन नेपाल (प्याब्सन) ले सोमबार काठमाडौंमा आयोजना गरेको पत्रकार सम्मेलनमा कोषमा २ हजार ३७० विद्यालयका शिक्षक र कर्मचारी आबद्ध भइसकेको जानकारी दिइएको हो ।
फागुन २६ र २७ गते सम्पन्न प्याब्सनको १६औं राष्ट्रिय महाधिवेशनबाट निर्वाचित केन्द्रीय कार्यसमितिले अब देशभर निजी क्षेत्रबाट स्थापित करिब ६ हजार विद्यालयहरुको नेतृत्व तीन वर्ष गर्नेछ । कार्यक्रममा प्याब्सनका नवनिर्वाचित अध्यक्ष कृष्णप्रसाद अधिकारीले शिक्षाको माध्यमबाट विकासको गतिलाई अघि बढाउने सबै विद्यालयको उद्देश्य रहेको बताए ।
त्यस्तै निवर्तमान अध्यक्ष डिके ढुंगानाले नीति निर्माण तहमा प्याब्सनको भूमिका महत्वपूर्ण रहँदै आएको र आवश्यक नीति निर्माणका लागि अझै सशक्त ढंगले लाग्ने प्रतिबद्धता जनाए । सामाजिक सुरक्षा कोषमा आबद्ध भएपछि शिक्षकको भावना र विद्यार्थीको सिकाइमै सकारात्मक प्रभाव परेको तर्क उनले गरे ।
त्यस्तै सहअध्यक्ष गोपाल आचार्यले एआई (आर्टिफिसियल इन्टेलिजेन्स) ले डोमिनेट गर्दै लगेको समाजमा हुर्किरहेका विद्यार्थीलाई सोही अनुसारको शिक्षा प्रवाह गर्न प्याब्सनमा आबद्ध विद्यालयहरु अघि बढिसकेको बताए । उनले सामाजिक सुरक्षा कोषमा आबद्धतापश्चात शिक्षकहरुले विद्यालय छाड्ने क्रममा धेरै सुधार आएको जानकारी दिए ।
कार्यक्रममा प्याब्सनले १६औं राष्ट्रिय महाधिवेशनले निर्दिष्ट गरेको दिशानिर्देशअनुसार तीन वर्षका लागि निम्न १३ वटा कार्ययोजनालाई प्राथमिकतामा राख्दै अघि बढ्ने नीति अख्तियार गरेको छ ।
१. गुणस्तरीय एवं प्रतिस्पर्धी शिक्षा : निजी विद्यालयहरूले प्रदान गर्दै आएको शैक्षिक गुणस्तरलाई अझै समय सापेक्ष बनाउँदै राष्ट्रिय तथा अन्तर्राष्ट्रिय क्षेत्रमा प्रतिस्पर्धी बनाउन निरन्तर क्रियाशील रहने, जसका लागि आवश्यकताअनुसार तीनै तहका सरकारसँग सहकार्य गर्ने ।
२. विद्यालय शिक्षालाई सबै नेपालीको पहुँचभित्र रहन आवश्यक प्रवर्धनात्मक क्रियाकलाप गर्दै यसको स्तर अभिवृद्धिका लागि नवप्रवर्तनमा जोड दिने ।
३. निजी विद्यालयको लगानी सुनिश्चितताको सवालमा हाल संसदमा छलफलमा रहेको शिक्षा विधेयकमा निजी विद्यालयलाई कम्पनीमै रहने व्यवस्था कायम राख्न आवश्यक सम्पूर्ण प्रयास गर्दै थप लगानीमैत्री वातावरण सिर्जना गर्ने ।
४. निजी विद्यालयमा कार्यरत शिक्षकशिक्षिका तथा कर्मचारीको सेवा सुविधाका सवालमा जिम्मेवार बन्दै सरकारद्वारा सञ्चालित सामाजिक सुरक्षा कोषमा आबद्ध गराउँदै लैजाने ।
५. पठनपाठन संस्कृतिको ह्रासप्रति संवेदनशील बन्दै पढ्ने संस्कृतितर्फ उन्मुख गराउनका लागि विशेष कार्यक्रमहरू सञ्चालन गर्ने ।
६. बाल शिक्षामैत्री विद्यालय निर्माणका लागि आवश्यक वातावरण बनाउने ।
७. सम्पूर्ण शिक्षक तथा कर्मचारीको क्षमता अभिवृद्धिका लागि विभिन्न तालिम तथा गोष्ठीको व्यवस्था गर्ने ।
८. प्याब्सनले आयोजना गर्दै आएको अन्तर्राष्ट्रिय शैक्षिक सम्मेलनलाई परिमार्जित गर्दै निरन्तरता दिइने ।
९. उच्च शिक्षाका लागि विदेश पलायन हुने गतिलाई कम गर्न सम्बन्धित सरकारी तथा निजी निकायहरूसँग आवश्यक सहकार्य गरी कमाउँदै, पढ्दै गर्ने नीतिलाई सहयोग पुर्याउने ।
१०. यस संगठनप्रतिको आम विश्वास र सद्भावलाई कायम राख्दै सांगठनिक ऐक्यबद्धता र आवश्यकतालाई अझै मजबुद गर्दै लैजाने ।
११. विभिन्न छात्रवृत्ति कार्यक्रमहरूमा देखापरेका समस्याप्रति गम्भीर हुँदै छात्रवृत्ति कार्यक्रमलाई लक्षित वर्ग र व्यक्तिसम्म पुर्याउन पहल गर्ने ।
१२. ४५ प्रतिशत आरक्षित छात्रवृत्तिको विषयमा २०८० चैत १४ को सम्मानित सर्वोच्च अदालतको निर्देशनात्मक आदेश कार्यान्वयनका लागि सम्बन्धित निकायहरूसँग समन्वय गर्ने ।
१३. प्याब्सन विद्यालयहरूको गुणस्तर सुनिश्चितताको मापदण्ड बनाई गुणस्तरीय बनाउने कार्यक्रम अवलम्बन गर्ने ।
