अन्तर्राष्ट्रिय महिला उद्यमी व्यापार मेला
ललितपुर । प्रधानमन्त्री केपी शर्मा ओलीले देशको विकासका लागि सिङ्गै समाज अगाडि बढाउन राज्यले प्रयास गरिरहेको बताएका छन् । महिला उद्यमी महासंघ नेपालको आयोजनामा आज बिहीबारबाट ललितपुरमा सुरु भएको आठौँ अन्तर्राष्ट्रिय महिला उद्यमी व्यापार मेलाको उद्घाटन समारोहमा प्रधानमन्त्री ओलीले अनावश्यक कुरामा नअल्झिएर देश विकासमा लागिरहने प्रतिबद्धता व्यक्त गरे ।
‘देशलाई पछि फर्काउन एउटा पक्ष लागिरहेको छ । १०-१५ हजारको जुलुस निस्कँदैमा उत्पात केही हुँदैन, अहिले ९७ प्रतिशत जनताको घरमा विद्युत पुगेको छ, विद्युत उत्पादन बढाउने काममा अघि बढेका छौँ,’ उनले भने ।
युवापुस्ताले सूचना प्रविधिको क्षेत्रमा राम्रो काम गरिरहेको भन्दै उनले खुसी व्यक्त गरे । ‘आजको समय कम्प्युटरको समय हो, एआई प्रविधिको समय हो, महिलाले पनि धेरै काम गर्नुभएको छ,’ उनले भने, ‘आजको मेला महिलामा पनि आमाहरुको मेला हो, अब छोरी पुस्ताले पनि उद्यमशीलतामा ध्यान दिनुपर्छ, दिदीबहिनीका प्रयासलाई म धन्यवाद भन्न चाहान्छु ।’
जकडिएर रहेका केही सामन्ती सोच र व्यवहारका कारण देश अगाडि बढ्न नसकेको उनले टिप्पणी गरे । प्रधानमन्त्रीले भने, ‘बाह्य रुपमा कायम रहेको उपनिवेश, देशभित्रै रहेको सामन्ती प्रथा र वर्णाश्रम व्यवस्थाले दबाइएको परिस्थितिका कारण हाम्रो समाज अगाडि बढ्न सकेन, महिलालाई शिक्षादीक्षा दिनुहुँदैन भन्ने सामन्ती सोच थियो, खुसी हुन पनि नपाइने समाज थियो, महिलालाई पछाडि पारेपछि देशको विकास नहुने नै भयो ।’
प्रधानमन्त्री ओलीले मानव ओसारपसार तथा बेचबिखनविरुद्ध अविच्छिन्न रुपमा काम गर्दै आएको संस्था माइती नेपालका अध्यक्ष अनुराधा कोइराला र उद्यमशीलता क्षेत्रमा योगदान गरेकोमा दाङ घोराहीका प्रेम कुमारी पुनलाई सम्मान गरेका छन् ।
महिला उद्यमी महासंघ नेपालकी अध्यक्ष शोभा ज्ञवालीले देशका ७७ जिल्लामध्ये ७२ जिल्लामा महासंघ मातहातको जिल्ला संघ गठन भइसकेको जानकारी गराइन् । उनले महासंघले महिला उद्यमीको सवाल र सरोकार सुनिश्चितताका पक्षमा वकालत गर्दै आएको बताइन् ।
ललितपुरको हेरिटेज गार्डेनमा सुरु भएको व्यापार मेला चैत १८ सम्म सञ्चालन हुनेछ । अध्यक्ष ज्ञवालीले यो अवधिमा दुई करोड २५ लाखभन्दा बढीको कारोबार हुने अपेक्षा गरेको जानकारी दिइन् ।
