काठमाडौं । फागुन ४ देखि १५ सम्म लगातार २११ अंकले बढेर फागुन १८ देखि घट्न थालेको बजार यसबीचमा जम्ममा दुई पटक उकालो लागेको छ । लगानीकर्ताको मनोबल उठ्न नसक्दा लगातार घटेको बजार फागुन २८ गते १७.२८ अंकले बढेको थियो भने आज सोमबार २६.१० अंकले बढेको छ ।
यसबीचमा सेयर बजार परिसूचक नेप्से २७५.६ अंकले घटेर २८९०.२८ अंकबाट आइतबारसम्ममा २६१४.६८ अंकमा झरेको थियो । लगातार घट्दा निराश बनेका लगानीकर्तामा आजको वृद्धिले केही आशा थपेको छ ।
आज सबै समूह उकालो लागेका छन् भने वित्त समूह सर्वाधिक ३.५२ अंकले बढेको छ । २१० कम्पनीको मूल्य बढ्दा ३३ वटाको घटेको छ । बजार बढे पनि कारोबार रकम भने बढ्न सकेन । आज ३२६ कम्पनीको ४ अर्ब ४८ करोड ३५ लाख रुपैयाँबराबरको सेयर किनबेच भएको छ ।
यो रकम आइतबारको तुलनामा कम हो । आइतबार ६ अर्ब ३२ करोड रुपैयाँबराबरको सेयर कारोबार भएको थियो ।
