काठमाडौं । कम्तीमा ३० प्रतिशत आयात प्रतिस्थापन गर्ने लक्ष्यसहित उद्योगी चन्द्रप्रसाद ढकाल नेतृत्वको आईएमई समूह कागज उद्योगमा प्रवेश गरेको छ । नेपाल उद्योग वाणिज्य महासंघका अध्यक्षसमेत रहेका ढकालले महोत्तरीमा नेपालकै ठूलो ‘नेपाल पल्प एन्ड पेपर इन्डस्ट्रिज प्रालि’ सञ्चालनमा ल्याएका हुन् ।
कागज उद्योगमा आईएमई ग्रुपको यो पहिलो लगानी हो । दुई अर्ब लगानीमा स्थापित उद्योगले पुसदेखि उत्पादन सुरु गरिसकेको जनाएको छ । उत्पादन सुरु भए पनि उद्योगको औपचारिक उद्घाटन भने बिहीबार( फागुन २२) प्रधानमन्त्री केपी शर्मा ओलीले गर्नेछन् ।
नेपालमा बढ्दो कागज आयातलाई प्रतिस्थापन गर्दै स्वदेशमै रोजगारी सिर्जना गर्ने उद्देश्यले उद्योग सञ्चालनमा ल्याइएको अध्यक्ष ढकालले बताएका छन् । ‘कम्तीमा ३० प्रतिशत आयात प्रतिस्थापन गर्ने लक्ष्यसहित कागज उद्योग खोलेका हौँ,’ उनले भने ।
नेपालमा वार्षिक करिब डेढ लाख मेट्रिक टन कागज खपत भइरहेको तथ्यांक छ । तर, घरेलु उद्योग नहुँदा अहिले सबै कामका लागि आवश्यक कागज विदेशबाट आयात गर्नुपर्ने अवस्था छ । स्कुल कलेजमा लेख्ने पढ्ने कापीदेखि फोटोकपी, ट्वाइलेट र टिस्यु पेपरसम्म विदेशबाट आयात भइरहेको छ ।
उद्योगले स्वदेशी कच्चापदार्थ र जनशक्ति परिचालन गरी उच्च गुणस्तरीय कागज उत्पादन गर्ने अध्यक्ष ढकालले बताए । उद्योगमा कम्तीमा ३ सय जनाले प्रत्यक्ष रोजगारी पाउनेछन् । उद्योगमा हाल ५० प्रतिशतभन्दा बढी स्थानीय कामदार छन् । त्यसमा २० प्रतिशत महिला रहेको आइएमई समूहले जनाएको छ ।
हाल उद्योगको दैनिक कागज उत्पादन क्षमता ७५ मेट्रिक टन छ । उद्योगले केही समयभित्रै क्षमता वृद्धि गरी दैनिक १५० मेट्रिक टन कागज उत्पादन गर्ने लक्ष्य राखेको अध्यक्ष ढकालले जानकारी दिए ।
भन्सार विभागको तथ्यांकअनुसार गत आर्थिक वर्ष २०८०/८१ मा नेपालमा ८ अर्ब १४ करोड रुपैयाँबराबरको कागज आयात भएको थियो । त्यस्तै चालु आर्थिक वर्षको साउनदेखि माघसम्ममा ३ अर्ब ६५ करोड रुपैयाँबराबरको आयात भइसकेको छ ।
