काठमाडौं । सोमबार सुनको मूल्य घटेको छ । नेपाल सुनचाँदी व्यवसायी महासंघका अनुसार आइतबार १ लाख ५० हजार ५०० रुपैयाँमा कारोबार भएको सुनको मूल्य आजका लागि प्रतितोला १ लाख ४९ हजार ३०० रुपैयाँ निर्धारण भएको हो ।
कात्तिक १५ गते सुनको भाउ हालसम्मकै उच्च १ लाख ७१ हजार रुपैयाँ पुगेको थियो । अन्तर्राष्ट्रिय बजारमा पनि मूल्य घटिरहेका बेला सरकारले भन्सार दर १० प्रतिशतमा झारेपछि सुनको मूल्य केही घटेको छ ।
त्यस्तै, आज चाँदीको मूल्य पनि घटेको छ । आइतबार १ हजार ८४० रुपैयाँ प्रतितोला रहेको चाँदी सोमबारका लागि १ हजार ८१५ रुपैयाँ निर्धारण भएको महासंघले जनाएको छ ।
